Тогтоол №1136

ХЭРГИЙН ТАНИЛЦУУЛГА: Нэхэмжлэгч нь "Капитал" ХХК-тай орон сууц захиалгаар бариулах гэрээ байгуулж, үнийг нь бүрэн төлсөн боловч тус компанийн нэр дээр бүртгэгдсэн орон сууц, авто зогсоолын бүртгэлийг хүчингүй болгож, өөрийгөө өмчлөгчөөр бүртгүүлэхийг Оюуны өмч, улсын бүртгэлийн ерөнхий газраас шаардсан. Учир нь уг хөрөнгийг "Капитал" ХХК нь "Капитрон банк" ХХК-д барьцаалсан байсан.

АНХАН ШАТ: Нийслэл дэх Захиргааны хэргийн анхан шатны шүүх нэхэмжлэгчийн шаардлагыг Улсын бүртгэлийн ерөнхий хууль болон Эд хөрөнгө өмчлөх эрхийн улсын бүртгэлийн тухай хуулийн холбогдох заалтуудыг үндэслэн бүхэлд нь хэрэгсэхгүй болгосон.

ДАВЖ ЗААЛДАХ ШАТ: Нэхэмжлэгчийн төлөөлөгч анхан шатны шүүхийн шийдвэрийг эс зөвшөөрч, иргэний хэргийн шүүхийн захирамжаар нэхэмжлэгчийг өмчлөгчөөр тогтоосон тул бүртгүүлэх эрхтэй, хариуцагч бүртгэлийн журмыг зөрчиж, хууль бус барьцааг үндэслэсэн гэж гомдол гаргасан. Давж заалдах шатны шүүх анхан шатны шийдвэрийг хэвээр үлдээж, гомдлыг хангахгүй орхисон.

ҮНДЭСЛЭЛ: Давж заалдах шатны шүүх, маргаан бүхий хөрөнгийг 2010 онд "Капитал" ХХК-ийн нэр дээр бүртгэхэд хуульд заасан татгалзах үндэслэл байгаагүй тул хариуцагчийн анхны бүртгэлийг буруутгах боломжгүй гэж үзсэн. Уг хөрөнгө нь "Капитрон банк" ХХК-ийн зээлийн барьцаанд бүртгэгдсэн бөгөөд Эд хөрөнгө өмчлөх эрх, түүнтэй холбоотой эд хөрөнгийн бусад эрхийн улсын бүртгэлийн тухай хуулийн 19.2-т зааснаар барьцаалагч банкны зөвшөөрөлгүйгээр өмчлөгчийг өөрчлөн бүртгэх боломжгүй юм. Иймд хариуцагчийн бүртгэхээс татгалзсан үйлдэл нь хуульд нийцсэн гэж дүгнэж, анхан шатны шүүхийн шийдвэрийг хэвээр үлдээв.