Тогтоол №1029

ХЭРГИЙН ТАНИЛЦУУЛГА: Иргэн Г. нь Сүхбаатар дүүргийн Засаг даргын иргэн Д.-д газар эзэмшүүлэх захирамжийг хүчингүй болгуулах, өөрийн нэр дээр 700 м.кв газар эзэмшүүлэх захирамж гаргуулахыг даалгах нэхэмжлэлийн шаардлага гаргасан. АНХАН ШАТ: Нийслэл дэх Захиргааны хэргийн анхан шатны шүүх Газрын тухай хуулийн 21.5.3, 27.1, 31.3, 32.1, 32.4, 32.5, 33.1.1-д заасныг баримтлан нэхэмжлэлийн шаардлагыг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгчийн өмгөөлөгч нь Засаг даргын захирамж нь Газрын тухай хууль зөрчсөн, Д.-ийн газар эзэмших эрх нь хууль бусаар үүссэн, бүртгэлийн дэвтэр засвартай, нотлох баримтыг буруу үнэлсэн гэх үндэслэлээр давж заалдах гомдол гаргасан. Давж заалдах шатны шүүх анхан шатны шүүхийн шийдвэрийг хэвээр үлдээж, гомдлыг хангахгүй орхисон.

ҮНДЭСЛЭЛ: Давж заалдах шатны шүүх гуравдагч этгээд Д. нь нэхэмжлэгчээс өмнө газар эзэмших хүсэлтээ гаргасан нь өргөдөл, гомдлын бүртгэлийн дэвтэр болон бүртгэл хяналтын картаар нотлогдсон тул Засаг даргыг буруутай гэж үзэх үндэслэлгүй. Нэхэмжлэгчийн тухайн газрыг өмнө нь эзэмшиж, хүсэлт гаргаж байсан гэх тайлбар баримтаар тогтоогдоогүй. Д. газар эзэмших хүсэлтэд талбайн хэмжээ, байршил нь тодорхой байсан бөгөөд хүсэлт гаргах үед тухайн газар нь кадастрын мэдээллийн санд бүртгэлгүй, бусдад хуулийн дагуу эзэмшүүлээгүй байсан. Д. хүсэлтэд өөрөө гарын үсэг зураагүй байсан ч иргэний үнэмлэхний хуулбар, кадастрын зургийг хавсаргасан нь хуульд заасан бүрдүүлбэрийг хангаж, хүсэл зоригоо илэрхийлсэн гэж үзсэн. Иймд Засаг даргын захирамж нь Газрын тухай хуульд нийцсэн бөгөөд маргаан бүхий захиргааны актын улмаас нэхэмжлэгчийн эрх, хууль ёсны ашиг сонирхол зөрчигдөөгүй байна.