Тогтоол №9442

ХЭРГИЙН ТАНИЛЦУУЛГА: М ХХК нь Шударга өрсөлдөөн, хэрэглэгчийн төлөө газрын байцаагчаас оногдуулсан 20 сая төгрөгийн шийтгэлийг эс зөвшөөрч, хүчингүй болгуулахаар шүүхэд гомдол гаргасан. Хариуцагч нь хэрэглэгчийн багцыг шинэчлэх үйл ажиллагааны явцад Зөрчлийн тухай хуулийн 10.2.3-т заасан хэрэглэгчийг хууран мэхлэх, төөрөгдүүлэх, хүч хэрэглэх замаар эрх ашгийг нь хохироосон гэх үндэслэлээр шийтгэл оногдуулсан. Гомдол гаргагч нь техникийн шинэчлэл, хэрэглэгчдэд мэдээлэл хүргэсэн, хэрэглэгчийг хууран мэхлэх, төөрөгдүүлэх, хүч хэрэглэх үйлдэл хийгээгүй гэж маргасан. Мөн шийтгэл оногдуулсан байцаагч нь эрх бүхий этгээд биш гэж үзсэн.

АНХАН ШАТ: Шударга өрсөлдөөн, хэрэглэгчийн төлөө газрын байцаагчаас М ХХК-д оногдуулсан 20,000,000 төгрөгийн шийтгэлийн хуудсыг хүчингүй болгожээ.

ҮНДЭСЛЭЛ: Шүүхээс техникийн шинэчлэл хийх зорилгоор багцыг шинэчлэх, хэрэглэгчдэд холбогдох мэдээллийг олон нийтийн хэвлэл мэдээлэл, цахим шуудан, цахим хуудас зэрэг олон сувгаар хүргүүлсэн нь хуульд заасан мэдэгдэх хугацаа, хэлбэртэй нийцсэн гэж үзсэн. Гэрээний дагуу үйлчилгээний нөхцөл, үнэ тариф өөрчлөгдсөн тохиолдолд мэдэгдсэнээс хойш тодорхой хугацааны дотор хэрэглэгч санал бодлоо илэрхийлэхгүй бол хүлээн зөвшөөрсөнд тооцох зохицуулалт нь хүч хэрэглэх гэсэн ойлголтод хамаарахгүй, харин хэрэглэгчийн эрхийг хохироосон, хууран мэхэлсэн, төөрөгдүүлсэн гэх үндэслэл тогтоогдоогүй байна. Хэрэглэгчийн эрхийг хамгаалах тухай хуулийн 7.2-т заасан мэдээллийг хангалттай хүргүүлсэн тул гомдол гаргагчийг буруутгах үндэслэлгүй. Байцаагчийн эрх хэмжээний асуудлаар ч маргаан үүсгэсэн боловч шүүх гомдол гаргагчийн шаардлагыг хангаж шийдвэрлэжээ.