Тогтоол №6534

ХЭРГИЙН ТАНИЛЦУУЛГА: "Х" ХХК нь БОАЖС-ын тушаалаар өөрт нь газар ашиглах эрх олгосон хэсгийг хүчингүй болгосныг эсэргүүцэв. Нэхэмжлэгч нь шүүхэд эрхээ хамгаалуулахаар хандсан байхад, шүүх хуралдаан түдгэлзүүлсэн байх хугацаанд нь газар ашиглах эрхийг нь дахин хүчингүй болгосон нь хууль зөрчсөн, дарамт учруулсан хэмээн үзсэн. Хариуцагч нь дархан цаазат газарт аялал жуулчлалын зориулалтаар газар олгох нь бусад газарт олгосноос ялгаатай, хууль зөрчсөн тул эрхийг нь цуцалсан гэж тайлбарлав. АНХАН ШАТ: Нэхэмжлэгчийн шаардлага болох БОАЖС-ын 2019 оны 07 дугаар сарын 10-ны өдрийн А/356 дугаар тушаалын "Х" ХХК-д холбогдох хэсгийг хүчингүй болгох шаардлагыг хангаж шийдвэрлэв.

ҮНДЭСЛЭЛ: Нэхэмжлэгчийн газар ашиглах эрх нь 2007 онд олгогдсон бөгөөд 12 жил өнгөрсөн байхад Захиргааны ерөнхий хуулийн 48 дугаар зүйлийн 48.3-т заасан 5 жилийн хугацаа хэтэрсэн тул хүчингүй болгох эрхгүй. Хариуцагчийн гаргасан шийдвэр нь бодит нөхцөл байдал, тэгш байдал, хууль ёсны итгэлийг хамгаалах зарчмуудад нийцээгүй. Тусгай хамгаалалттай газар нутгийн тухай хуулийн 11 дүгээр зүйлийн 7, 36 дугаар зүйлийг үндэслэн дархан цаазат газрын хязгаарлалтын бүсэд аялал жуулчлалын зориулалтаар газар ашиглах эрх олгож байсан. Шүүхээс маргаан бүхий газарт хийсэн үзлэгээр тэнд суурьшил бий болсон нь тогтоогдсон бөгөөд "аялагч, зөвшөөрөл бүхий бусад хүн түр буудаллах, отоглох, ажиглалт, судалгаа шинжилгээ хийх зориулалт"-аар ашиглах боломжгүй байсан. Хариуцагч нь нийтийн эрх ашгийг хамгаалах нэрийдлээр, шүүхээс маргаан бүхий трассын байршлыг тогтоох ажиллагаа үргэлжилж байхад гаргасан шийдвэр нь зорилгодоо нийцээгүй.