Тогтоол №6535

ХЭРГИЙН ТАНИЛЦУУЛГА: Аялал жуулчлалын зориулалттай газар эзэмших эрхийг хүчингүй болгосон захиргааны актыг нь хууль бус болохыг тогтоолгох нэхэмжлэл гаргасан. Нэхэмжлэгч нь эрхээ хамгаалуулах гэж шүүхэд хандахад нь уг эрхийг нь дахин хүчингүй болгосон нь эрх зүйн зөрчилтэй гэж үзэж байна. Хариуцагч нь тусгай хамгаалалттай газарт аялал жуулчлалын зориулалтаар газар олгосон нь хууль зөрчсөн, нийтийн ашиг сонирхлыг зөрчсөн тул хүчингүй болгосон гэж тайлбарлаж байна. АНХАН ШАТ: “У” ХХК-ийн нэхэмжлэлийг хангаж, Байгаль орчин, аялал жуулчлалын сайдын 2019 оны 07 дугаар сарын 10-ны өдрийн А/356 дугаар тушаалын “У” ХХК-д холбогдох хэсгийг хүчингүй болгожээ.

ҮНДЭСЛЭЛ: Газар ашиглах эрх олгосон захиргааны актыг нь хүчингүй болгосон нь Захиргааны ерөнхий хуулийн 48 дугаар зүйлийн 48.3-д заасан таван жилийн хугацааг хэтэрсэн, иргэдийн эрх, хууль ёсны ашиг сонирхолд халдсан, бодит нөхцөл байдалтай нийцээгүй, төрийн үйл ажиллагааны тэгш байдал, хууль ёсны итгэлийг хамгаалах зарчмуудыг зөрчсөн байна. Тусгай хамгаалалттай газар нутгийн тухай хуулийн 11 дүгээр зүйлийн 7-д зааснаар дархан цаазат газрын хязгаарлалтын бүсэд түр буудаллах, отоглох, ажиглалт, судалгаа шинжилгээ хийх зориулалтаар байр ашиглахыг зөвшөөрдөг боловч, эргэн тойронд нь орон сууцны хороолол баригдсан, нэхэмжлэгчийн газрыг аялал жуулчлалын зориулалтаар ашиглах боломжгүй байхад хууль зөрчсөн гэх үндэслэлгүй байна.