Тогтоол №3708

ХЭРГИЙН ТАНИЛЦУУЛГА: Төрийн захиргааны албан хаагч Ж.Уянгыг ажлаас үндэслэлгүй халсан тушаалыг хүчингүй болгуулах, ажилгүй байсан хугацааны цалин, шимтгэлийг нөхөн төлүүлэх, албан тушаалд эгүүлэн томилуулах шаардлага бүхий нэхэмжлэл гаргасан. Хариуцагч нь байгууллагын зохион байгуулалтын өөрчлөлттэй холбогдуулан ажлын байр цөөрч, хуульд заасан журмын дагуу ажлаас чөлөөлсөн гэж маргасан. АНХАН ШАТ: Нэхэмжлэлийн шаардлагаар захиргааны актыг түдгэлзүүлж, тодорхой хугацааны цалинг олгох, шимтгэл төлөхийг даалгаж, илүү нэхэмжилсэн цалинг хэрэгсэхгүй болгосон. Захиргааны акт дахин шинэчлэгдэхгүй бол хүчингүй болсонд тооцохоор шийдвэрлэсэн.

ҮНДЭСЛЭЛ: Төрийн албаны тухай хуулийн 7 дугаар зүйлийн 7.1.7-д заасан албан тушаалд төрийн захиргааны ангилалд ажиллаж байсныг тогтоосон. Засгийн газрын тогтоолоор байгууллагын бүтэц, орон тоо өөрчлөгдсөн боловч албан тушаалын тодорхойлолтод заасан чиг үүрэг бүрэн хасагдаагүй, зарим тохиолдолд нэг орон тоо цөөрсөн байсан. Төрийн албан хаагчийг ажлаас чөлөөлөхдөө Төрийн албаны тухай хуулийн холбогдох заалтыг баримтлах ёстой байтал Хөдөлмөрийн тухай хуулийг үндэслэсэн нь учир дутагдалтай. Ажлын байрны шаардлагыг хэн илүү хангаж байгааг тогтоох боломжгүй тул захиргааны актын хууль зүйн үндэслэлийг цаашид тодруулах шаардлагатай гэж үзэж, захиргааны актын хүчин төгөлдөр байдлыг тодруулах хүртэл түдгэлзүүлсэн. Нэхэмжлэгчийн ажилгүй байсан хугацааны цалин, шимтгэлийг хуульд заасны дагуу олгох, илүү нэхэмжилсэн хэсгийг хэрэгсэхгүй болгох, захиргааны акт хүчингүй болсон тохиолдолд бусад шаардлагыг хангахаар шийдвэрлэсэн.