ХЭРГИЙН ТАНИЛЦУУЛГА: Иргэн нь Санхүүгийн албаны даргын албан тушаалаас үндэслэлгүй халагдсан гэж үзэн, ажлаас чөлөөлсөн захирамжийг хүчингүй болгох, урьд эрхэлж байсан албан тушаалдаа эгүүлэн тогтоолгох, ажилгүй байсан хугацааны цалинг гаргуулах шаардлага гаргасан. АНХАН ШАТ: Шүүх нэхэмжлэлийн шаардлагыг хангаж, захирамжийг хүчингүй болгож, иргэнийг албан тушаалд нь эгүүлэн тогтоож, ажилгүй байсан хугацааны цалин гаргуулах шийдвэр гаргасан.
ҮНДЭСЛЭЛ: Төрийн албаны тухай хуулийн 16.2.3-т заасан "албан үүргийн хувьд нэг нь нөгөөдөө шууд захирагдах" нөхцөл нь гэр бүл, төрөл садантай хамт ажиллахыг хориглох зохицуулалт бөгөөд энэ нь төрийн жинхэнэ албан хаагчийг ажлаас чөлөөлөх үндэслэл болохгүй. Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 3.1.5-т заасан хамаарал бүхий этгээд гэдэгт хамаарахгүй тул ашиг сонирхлын зөрчил үүсэх нөхцөлгүй. ТЗ-5 шатлалтай албан тушаалтан нь хувийн ашиг сонирхлын мэдүүлэг болон хөрөнгө орлогын мэдүүлэг гаргах үүрэг хүлээдэггүй. Хариуцагч нь Захиргааны ерөнхий хуульд заасан сонсох ажиллагааг хийгээгүй, эрх бүхий байгууллагатай зөвшилцөх ажиллагааг хэрэгжүүлэлгүй шийдвэр гаргасан. Иймд захирамжийг хүчингүй болгож, албан тушаалд эгүүлэн тогтоож, цалинг гаргуулах нь хуульд нийцнэ.