Нийслэлийн Иргэний хэргийн давж заалдах шатны шүүхийн Магадлал

Үйл явдал

Бусдын эрүүл мэндэд гэм хор учруулсан этгээд эмчилгээний зардлыг гаргуулж өгөх үүрэг болон түүний хэмжээг тогтоох маргаан. Хариуцагч нь нэхэмжлэгчийн биед хамар ясны хугарал гэх гэмтэл санаатайгаар учруулсан нь эрх бүхий байгууллагын шийдвэрээр тогтоогдсон тул эмчилгээний зардлыг төлөх ёстой.

Талуудын байр суурь

• Нэхэмжлэгч: Хариуцагчийн үйлдлийн улмаас хамрын хагалгаа хийлгэх шаардлагатай болсон тул эмчилгээний зардлыг гаргуулна гэж шаардсан.
• Хариуцагч: Өөрийгөө гэм буруугүй гэж маргаж, эмчилгээний зардал гарсан гэх үндэслэлгүй тул төлөх үүрэггүй гэж үзсэн.

Шатуудын шийдвэр

Анхан шатны шүүх нэхэмжлэлийн шаардлагыг нотлох баримт дутуу тул хэрэгсэхгүй болгосон бол давж заалдах шатны шүүх нэхэмжлэлийн шаардлагын зарим хэсгийг хангаж, шийдвэрт өөрчлөлт оруулсан. Учир нь нэхэмжлэгч эмчилгээний зардлын хэмжээг тайлбарласан боловч баримт ирүүлээгүй байсан ч хариуцагч нь тухайн зардлын хэмжээг няцааж, эсэргүүцэх баримт ирүүлээгүй тул нэхэмжлэгчийн тайлбарыг хүлээн зөвшөөрсөнд тооцох ёстой (Иргэний хэрэг шүүхэд хянан шийдвэрлэх тухай хууль 42.4).

Хууль зүйн гол дүгнэлт

• Бусдын эрүүл мэндэд гэм хор учруулсан этгээд нь хохирогчийн асарч сувилах, зайлшгүй бүх зардлыг төлөх үүрэгтэй (Иргэний хууль 497.1, 228.4).
• Эрх бүхий байгууллагын шийдвэрээр хариуцагчийн гэм буруутай үйлдлийг тогтоосон тохиолдолд шүүх хариуцагчийн гэм бурууг дахин нотлохгүй (Иргэний хэрэг шүүхэд хянан шийдвэрлэх тухай хууль 40.4).
• Нэг талын гаргасан тайлбарыг эсрэг тал эсэргүүцээгүй, эсхүл хуулиар тогтоосон хугацаанд тайлбар өгөөгүй бол түүнийг хүлээн зөвшөөрсөнд тооцно (Иргэний хэрэг шүүхэд хянан шийдвэрлэх тухай хууль 42.4).