Тогтоол №20240

ХЭРГИЙН ТАНИЛЦУУЛГА: Гэм хорын хохирол гаргуулах тухай нэхэмжлэл. Нэхэмжлэгч нь дүүгийнхээ нас барсны шалтгааныг тогтоолгох гэж удаан хугалцаагаар эрх бүхий байгууллагуудад хандсан боловч хэргийг хөөн хэлэлцэх хугацаа дууссан гэх үндэслэлээр хаасан, улмаар хуулийн байгууллагын үйл ажиллагаанд гомдолтой байгаа тул нас барсны улмаас учирсан гэм хор, оршуулгын зардал, өмгөөлөгчийн хөлс, сэтгэл санааны хохирлыг хариуцагчаас гаргуулахыг шаардсан. Хариуцагч нь нас барсны улмаас учирсан гэм хор хариуцахгүй, хөнгөн гэмтэл учруулсан нь тогтоогдсон боловч хөөн хэлэлцэх хугацаа дууссан тул хэргийг хэрэгсэхгүй болгосон, хүчин төгөлдөр шийдвэрээр гэм буруутай нь тогтоогдоогүй байхад иргэний хэргийн шүүхээр хариуцуулж буйд эсэргүүцэлтэй байдаг. АНХАН ШАТ: Гэм буруутайд тооцогдоогүй ч учруулсан гэмтлийг үндэслэн сэтгэл санааны хохирол, өмгөөллийн хөлс гэсэн нийт 13,000,000 төгрөгийг хариуцагчаас гаргуулж, оршуулгын зардлыг хариуцагчаас гаргуулах үндэслэлгүй хэмээн үзэж хэргийг хэсэгчлэн хангаж шийдвэрлэсэн. ДАВЖ ЗААЛДАХ ШАТ: Нэхэмжлэгчийн төлөөлөгч нь анхан шатны шүүхийн шийдвэрт өөрчлөлт оруулж, оршуулгын зардлыг хариуцагчаас гаргуулахыг шаардсан. Хариуцагч нь гэм буруутай нь тогтоогдоогүй байхад хариуцуулсан, өмгөөлөгчийн хөлс гаргуулсанд гомдолтой байгаагаа илэрхийлж, шийдвэрийг хүчингүй болгохыг хүссэн. Давж заалдах шатны шүүх анхан шатны шүүхийн шийдвэрийг хэвээр үлдээж, талуудын гомдлуудыг хангахгүй орхисон. ҮНДЭСЛЭЛ: Хохирогчийн үхлийн шалтгаан нь осголт гэж тогтоогдсон, хариуцагч нь хүний амь насыг хохироогүй, гэмт хэрэг хөөн хэлэлцэх хугацаа дууссан тул эрүүгийн хэргийг хэрэгсэхгүй болгосон байдал, хариуцагч нь хохирогчийн биед хөнгөн гэмтэл учруулсан нь тогтоогдсон тул Иргэний хуулийн 497 дугаар зүйлийн 497.1-д заасны дагуу сэтгэл санааны хохирол, өмгөөлөгчийн хөлсийг гаргуулсан нь хуульд нийцсэн гэж дүгнэсэн. Оршуулгын зардлыг Иргэний хуулийн 508 дугаар зүйлийн 508.1-д заасны дагуу хариуцагчаас гаргуулах хууль зүйн үндэслэлгүй гэж үзсэн.