Тогтоол №17884

ХЭРГИЙН ТАНИЛЦУУЛГА: Нэхэмжлэгч нь ажлаас үндэслэлгүй халсан гэх үндэслэлээр ажилгүй байсан хугацааны цалин, нийгмийн болон эрүүл мэндийн даатгалын шимтгэл нөхөн бичүүлүүлэхээр нэхэмжлэл гаргасан. Хариуцагч нь нэхэмжлэлийг эс зөвшөөрч, хуулийн дагуу ажилд эгүүлэн тогтоох ажиллагаа явагдсан ч нэхэмжлэгч өөрөө ажилд орохоос татгалзсан, давхар ажил хийсэн байх тул нэхэмжлэлийг бүхэлд нь хүлээн зөвшөөрөхгүй гэв. АНХАН ШАТ: Хариуцагчаас нэхэмжлэгчид ажилгүй байсан хугацааны цалин хөлстэй тэнцэх 14,846,510 төгрөгийг гаргуулан олгуулах, нийгмийн болон эрүүл мэндийн даатгалын дэвтэрт зохих бичилт хийлгүүлэхийг даалгасан. ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч анхан шатны шүүхийн шийдвэрийг үндэслэлгүй гэж гомдол гаргав. Нэхэмжлэгч нь хариуцагчийн буруутай үйл ажиллагааны улмаас хохирсон тул ажилгүй байсан хугацааны олговрыг шаардах эрхтэй гэж үзэн, анхан шатны шийдвэрт өөрчлөлт оруулж, нэхэмжлэгчийн ажилгүй байсан хугацааны цалин хөлсийг 13,878,200 төгрөгөөр тооцон гаргуулах, улсын тэмдэгтийн хураамжийг 227,341 төгрөгөөр тооцон шийдвэрлэсэн.

ҮНДЭСЛЭЛ: Шүүхийн шийдвэрээр ажилтныг ажилд нь эгүүлэн тогтоосон бол ажилгүй байсан бүх хугацаанд нь урьд авч байсан дундаж цалин хөлстэй тэнцэх олговрыг ажил олгогчоос олгоно. Хариуцагч байгууллага шүүхийн шийдвэрийг биелүүлээгүй, нэхэмжлэгчийн эрхийн зөрчил үргэлжилсэн тул нэхэмжлэгч нь олговрыг шаардах эрхтэй. Нэхэмжлэгч нь өөр ажил эрхэлж байсан нь буруу халсан үеийн олговрыг олгохгүй байх үндэслэл болохгүй.