ХЭРГИЙН ТАНИЛЦУУЛГА: Нэхэмжлэгч "Д Г" ХХК нь хариуцагч "Б Б Т" ХХК-д холбогдуулан худалдах, худалдан авах гэрээний үүрэгт 45 000 000 төгрөг гаргуулах тухай нэхэмжлэл гаргасан. Хариуцагч тал нь гэрээг компанийн төлөөлөх эрхгүй этгээд байгуулсан, гэрээний зүйл доголдолтой байсан тул гэрээнээс татгалзаж, учирсан хохирлыг барагдуулахаар сөрөг нэхэмжлэл гаргасан.
АНХАН ШАТ: Хариуцагчийн сөрөг нэхэмжлэлийн шаардлагад ногдох улсын тэмдэгтийн хураамжийг хуульд заасан хэмжээгээр төлөөгүй гэх үндэслэлээр хүлээн авахаас татгалзсан. Худалдах, худалдан авах гэрээний үүрэгт 45 000 000 төгрөгийг хариуцагчаас гаргуулан нэхэмжлэгчид олгож, улсын тэмдэгтийн хураамжийг хариуцагчаас гаргуулан нэхэмжлэгчид олгож шийдвэрлэсэн.
ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч нь анхан шатны шүүх хэт нэг талыг барьж, нотлох баримтуудыг үнэлэлгүй, хэрэг хянан шийдвэрлэх ажиллагааны алдаа гаргаж, гэрч асуулгах хүсэлтийг хангаагүй, шүүгчийг татгалзан гаргах асуудлыг хууль бусаар шийдвэрлэсэн хэмээн гомдол гаргасан.
ҮНДЭСЛЭЛ: Давж заалдах шатны шүүхээс анхан шатны шүүх хариуцагчийн гаргаж буй сөрөг нэхэмжлэл нь хоёр шаардлага байх тул гэрээнээс татгалзах шаардлагад ногдох улсын тэмдэгтийн хураамжийг хуульд заасан хэмжээгээр төлөөгүй гэх үндэслэлээр уг нэхэмжлэлийг хүлээн авахаас татгалзсан нь Иргэний хэрэг шүүхэд хянан шийдвэрлэх тухай хуулийн 65 дугаар зүйлийн 65.1.11-т заасантай нийцэхгүй, мөн гэрч асуулгах хүсэлтийг хангаагүй нь талуудын мэтгэлцэх эрх болон нотлох баримтыг шүүхийн журмаар бүрдүүлэхтэй холбоотой хуулийн заалтуудыг зөрчсөн гэж үзэн анхан шатны шүүхийн шийдвэрийг хүчингүй болгож, хэргийг дахин хэлэлцүүлэхээр анхан шатны шүүхэд буцаасан.