Тогтоол №2347

ХЭРГИЙН ТАНИЛЦУУЛГА: Т.Л нь оюутан хөтөлбөрт оруулна, АПУ компаниас явна, хөргөгч өгнө, урьдчилгаа төлбөр шаардлагатай, АПУ компанийн борлуулагч, худалдааны төлөөлөгч болгоно, хүүхэд шалгаруулж сургалтын төлбөрийг хийж өгнө гэх зэргээр 26 хохирогчийг залилан мэхэлж, нийт 31,858,500 төгрөгийн хохирол учруулсан гэмт хэрэгт холбогдсон. АНХАН ШАТ: Анхан шатны шүүх Т.Л-г залилах гэмт хэргийг байнга үйлдэж амьдралын эх үүсвэр болгосон гэм буруутайд тооцож, Эрүүгийн хуулийн тусгай ангийн 17.3 дугаар зүйлийн 3.1-д зааснаар 10 жил хорих ял шийтгэж, өмнөх ялын эдлээгүй үлдсэн 9 сар 15 хоног хорих ялыг нэмж, нийт 10 жил 9 сар 15 хоног хорих ялаар шийтгэсэн. ДАВЖ ЗААЛДАХ ШАТ: Давж заалдах шатны шүүх анхан шатны шүүхийн шийтгэх тогтоолыг хэвээр үлдээж, шүүгдэгч болон түүний өмгөөлөгчийн гаргасан гомдлыг хэрэгсэхгүй болгосон. ХЯНАЛТЫН ШАТ: Шүүгдэгч Т.Л нь давж заалдах шатны шүүхийн магадлал Эрүүгийн хуулийг буруу хэрэглэсэн, хэрэглэвэл зохих хуулийг хэрэглээгүй, Эрүүгийн хэрэг хянан шийдвэрлэх тухай хуулийг зөрчсөн, хууль зүйн үндэслэлгүй гэж гомдол гаргасан. Тухайлбал, гэм буруугаа хүлээн зөвшөөрсөн, хохирол барагдуулсан, гэмт хэргийг өөрийн сайн дураар илчилсэн тохиолдолд ялыг хөнгөрүүлэх хуулийн заалтыг хэрэглэх ёстой байсан гэж үзсэн. Мөн прокуророос ажилгүй, орлогогүй гэж дүгнэлт гаргасан нь бодит байдалтай зөрчилдсөн байсан тул прокурорын дүгнэлт болон шүүхийн шийдвэр нь хууль зүйн үндэслэлгүй гэж байв. ҮНДЭСЛЭЛ: Хяналтын шатны шүүх хэргийн жинхэнэ байдалд нийцсэн, хууль зүйн үндэслэл бүхий нотлох баримтуудаар Т.Л-ийн гэм буруу нь нотлогдсон гэж үзсэн. Анхан болон давж заалдах шатны шүүх Эрүүгийн хуулийг буруу хэрэглээгүй, Эрүүгийн хэрэг хянан шийдвэрлэх тухай хуулийг ноцтой зөрчөөгүй байна. Т.Л-ийн гэмт үйлдлийн арга, давтамж, хэвшил, учирсан хохирлын хэмжээг харгалзан үзэж, залилах гэмт хэргийг байнга үйлдэж амьдралын эх үүсвэр болгосон гэж хүндрүүлэн зүйлчилснийг буруутгах үндэслэлгүй. Эрүүгийн хариуцлага оногдуулахдаа Эрүүгийн хуулийн ерөнхий ангийн хэм хэмжээг зөв баримталж, ялыг зөв тогтоосон байна. Иймд анхан болон давж заалдах шатны шүүхийн шийдвэрийг хэвээр үлдээж, шүүгдэгчийн гомдлыг хэрэгсэхгүй болгожээ.