Тогтоол №8510

ХЭРГИЙН ТАНИЛЦУУЛГА: Архи, согтууруулах ундааны зүйл хэрэглэсэн үедээ гэр бүлийн хүчирхийлэл үйлдэн, эхнэрээ хутгалж эрүүл мэндэд нь хүнд хохирол учруулсан хэрэг. АНХАН ШАТ: Эрүүгийн хуулийн 11.3 дугаар зүйлийн 1 дэх хэсэгт зааснаар хүний эрүүл мэндэд хүнд хохирол болгоомжгүйгээр учруулсан гэм буруутайд тооцож, нэг жилийн хорих ял оногдуулж, галт зэвсэг эзэмших, ашиглах эрхийг нэг жилээр хасч, цагдан хорих таслан сэргийлэх арга хэмжээ авч, эд мөрийн баримтаар хураагдсан хутгыг устгахаар шийдвэрлэжээ. ДАВЖ ЗААЛДАХ ШАТ: Шүүгдэгч ялыг хөнгөрүүлэх, тэнсэн харгалзах ял болгохыг хүссэн. Хохирогч болон өмгөөлөгч нь шүүгдэгчийн биеийн байдал, ар гэр, гэр бүлийн нөхцөл байдлыг харгалзан ялыг хөнгөрүүлэх саналтай байсан. Прокурор анхан шатны шүүхийн шийтгэх тогтоол хэвээр үлдээхийг хүссэн.

ҮНДЭСЛЭЛ: Гэрч, хохирогчийн мэдүүлэг, шинжээчийн дүгнэлт, шүүгдэгч болон хохирогчийн шүүх хуралдаанд өгсөн тайлбарууд, хуулийн холбогдох зүйл заалтуудыг үндэслэн хэргийг хянан хэлэлцжээ. Мөрдөн шалгах ажиллагаа болон анхан шатны шүүхийн шийдвэрт ноцтой зөрчил гараагүй, оногдуулсан ял нь үйлдсэн гэмт хэргийн шинж чанар, хэмжээ, шүүгдэгчийн хувийн байдалд тохирсон гэж үзэн анхан шатны шүүхийн шийтгэх тогтоолыг хэвээр үлдээж, давж заалдах гомдлыг хэрэгсэхгүй болгож, шүүгдэгчийн цагдан хоригдсон хоногийг ял эдлэх хугацаанд оруулан тооцжээ.