Тогтоол №7210

ХЭРГИЙН ТАНИЛЦУУЛГА: Хууль бус бүрэлдэхүүнтэй шүүх хуралдаанаар хэргийг шийдвэрлэсэн байдалтай холбогдуулан анхан шатны шүүхийн шийтгэх тогтоолыг эс зөвшөөрч прокурор эсэргүүцэл бичжээ. АНХАН ШАТ: Хүний эрүүл мэндэд хүнд хохирол санаатай учруулсан гэмт хэрэгт тусгайлан бэлтгэсэн зэвсгийн чанартай зүйл хэрэглэсэн гэм буруутайд тооцож, Эрүүгийн хуулийн тусгай ангийн 11.1 дүгээр зүйлийн 2.4-т зааснаар 5 жил хорих ял оногдуулж, өмнөх ялтай нэгтгэн нийт 6 жил 7 сар 18 хоногийн ял эдлүүлэхээр шийтгэжээ. ДАВЖ ЗААЛДАХ ШАТ: Прокурорын эсэргүүцэл нь Эрүүгийн хэрэг хянан шийдвэрлэх тухай хуулийн 3.3 дугаар зүйлийн 1 дэх хэсэгт заасан найман жилээс дээш хорих ял оногдуулахаар заасан гэмт хэргийг гурван шүүгчийн бүрэлдэхүүнтэйгээр хянан шийдвэрлэх журмыг ноцтой зөрчсөн үндэслэлтэй гэж үзэн анхан шатны шүүхийн шийтгэх тогтоолыг хүчингүй болгож, хэргийг анхан шатны шүүхийн урьдчилсан хэлэлцүүлэгт буцаажээ. Мөн хохирогчийн биед учруулсан гэмтлийн нөхцөл байдал, хэргийн цаг хугацааг нарийвчлан шалгаагүй, яллах дүгнэлтэд зөрүүтэй байдал зэрэг үндэслэлээр прокурорын эсэргүүцлийн зарим хэсгийг хангажээ.

ҮНДЭСЛЭЛ: Эрүүгийн хэрэг хянан шийдвэрлэх тухай хуулийн 3.3 дугаар зүйлийн 1 дэх хэсэгт найман жилээс дээш хорих ял оногдуулахаар заасан гэмт хэргүүдийг гурван шүүгчийн бүрэлдэхүүнтэйгээр хянан шийдвэрлэхээр хуульчилсан нь энэ хэргийн хувьд ноцтой зөрчигдсөн тул анхан шатны шүүхийн шийдвэрийг хүчингүй болгож, хэргийг урьдчилсан хэлэлцүүлэгт буцаах нь зүйтэй.