Тогтоол №5907

ХЭРГИЙН ТАНИЛЦУУЛГА: Тээврийн хэрэгслийн хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний актыг зөрчсөний улмаас хүний эрүүл мэндэд хүндэвтэр хохирол учруулсан хэрэг. АНХАН ШАТ: Тээврийн хэрэгслийн хөдөлгөөний аюулгүй байдлын тухай хууль, захиргааны хэм хэмжээний актыг зөрчсөн гэм буруутайд тооцож, 450,000 төгрөгөөр торгож, торгох ялыг 2 сарын хугацаанд хэсэгчлэн төлөхөөр тогтоосон. Хохирогч нь хохирлоо иргэний хэрэг шүүхэд хянан шийдвэрлэх журмаар нэхэмжлэх эрхтэйг дурдсан. ДАВЖ ЗААЛДАХ ШАТ: Хохирогч, түүний өмгөөлөгч нар хэргийн материалтай танилцуулаагүй, хохирлыг бүрэн тогтоогоогүй, шүүх эмнэлгийн дүгнэлт дутуу гарсан, хэргийг бүрдүүлэх ажиллагаа дутуу хийсэн гэж гомдол гаргасан. Шүүхээс хохирогчийн эрхийг хязгаарласан, Эрүүгийн хэрэг хянан шийдвэрлэх тухай хуулийг ноцтой зөрчсөн гэж үзэн анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр анхан шатны шүүхийн урьдчилсан хэлэлцүүлэгт буцаасан.

ҮНДЭСЛЭЛ: Эрүүгийн хэрэг хянан шийдвэрлэх тухай хуулийн 16.2 дугаар зүйлийн 1.5-д заасан хохирогчийн эрүүл мэндэд учирсан хохирлыг бүрэн гүйцэд тогтоогоогүй, 8.2 дугаар зүйлийн 1.8-д зааснаар хавтаст хэргийн материалтай танилцуулах, гэмт хэргийн улмаас учирсан хохирол, хор уршгийг нэхэмжлэх боломжоор хангаагүй, хохирогчийн шүүх хуралдаан дээр гаргасан хүсэлтийг хэлэлцээгүй орхигдуулж, хохирогчийн хуулинд заасан эрхийг хязгаарлаж, Эрүүгийн хэрэг хянан шийдвэрлэх тухай хуулийг ноцтой зөрчсөн нь тогтоогдсон.