Тогтоол №5233

ХЭРГИЙН ТАНИЛЦУУЛГА: Согтууруулах ундаа хэрэглэсэн үедээ цагдаагийн алба хаагчийг албан үүргээ гүйцэтгэж байхад нь зодож, хөнгөн хохирол учруулсан, мөн хууль сахиулагчийг албан үүргээ биелүүлэхтэй нь холбогдуулан хүч хэрэглэсэн гэмт хэрэгт шүүгдэгч Б.М холбогджээ. АНХАН ШАТ: Шүүгдэгч Б.М-ыг бусдын эрүүл мэндэд санаатай халдах, хөнгөн хохирол учруулах, мөн хууль сахиулагчийг албан үүргээ биелүүлэхтэй нь холбогдуулан хүч хэрэглэсэн гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар 450,000 төгрөгөөр торгох, Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар 6 сараар хорих ялаар шийтгэж, улмаар ял шийтгэлийг нэгтгэн 7 сарын хорих ял оногдуулжээ. ДАВЖ ЗААЛДАХ ШАТ: Шүүгдэгч Б.М нь анхан шатны шүүх Эрүүгийн хуулийг буруу хэрэглэсэн, үйлдсэн гэмт хэргээ чин санаанаасаа гэмшин ухамсарласан, учруулсан хохирлоо арилгасан, хүүхэдтэй зэрэг нөхцөл байдлыг харгалзан тэнсэн харгалзах ял оногдуулах боломжтой байсан хэмээн гомдол гаргасан. ҮНДЭСЛЭЛ: Давж заалдах шатны шүүх анхан шатны шүүхийн шийтгэх тогтоолын тодорхойлох хэсэгт шүүгдэгчийн урьд ял шийтгүүлж байсан эсэх талаарх дүгнэлт нь хэрэгт авагдсан баримтад үндэслэгдэхгүй байгаа, мөн тодорхойлох хэсэгт зарим хуулийн зүйл заалтыг дурдсан боловч тогтоох хэсэгт шийдвэрлээгүй алдаа гаргасан зэрэг үндэслэлээр анхан шатны шүүхийн шийтгэх тогтоолыг хүчингүй болгож, хэргийг анхан шатны шүүхэд буцааж, урьд авсан цагдан хорих таслан сэргийлэх арга хэмжээг хэвээр үргэлжлүүлэхээр тогтоожээ.