Тогтоол №3484

ХЭРГИЙН ТАНИЛЦУУЛГА: Шүүгдэгчийг хохирогчдын үхрийг хулгайлсан хоёр үйлдэлд анх Эрүүгийн хуулийн 145.2-т заасан гэмт хэрэгт холбогдуулан шалгажээ. Мөрдөн байцаалтын явцад прокурор нэг үйлдлийг хэрэгсэхгүй болгож, нөгөөг Эрүүгийн хуулийн 145.1-т зааснаар зүйлчлэн шүүхэд шилжүүлсэн.

АНХАН ШАТ: Анхан шатны шүүх прокурорын хэрэгсэхгүй болгосон тогтоолыг үндэслэлгүй гэж үзэн, хэргийг мөрдөн байцаалтанд буцааж, зүйлчлэлийг хүндрүүлэх шаардлагатай гэж захирамжилжээ. Улмаар прокурор хэргийг Эрүүгийн хуулийн 145.2-т зааснаар дахин зүйлчилсэн бөгөөд анхан шатны шүүх шүүгдэгчийг гэмт хэргийг давтан үйлдсэн гэж үзэн, баривчлах ял шийтгэсэн.

ДАВЖ ЗААЛДАХ ШАТ: Шүүгдэгчийн өмгөөлөгч анхан шатны шүүх прокурорын тогтоолыг хүчингүй болгож, хэргийг хүндрүүлэн шийдвэрлэсэн нь хууль зүйн үндэслэлгүй, шүүгдэгчийн эрх зүйн байдлыг дордуулсан хэмээн гомдол гаргасан. Давж заалдах шатны шүүх анхан шатны шүүх прокурорын хэргийг хэрэгсэхгүй болгосон тогтоолыг хүчингүй болгох, хэргийг нэмэлт ажиллагаагаар буцааж зүйлчлэлийг хүндрүүлэх эрхгүй байсан нь Эрүүгийн байцаан шийтгэх хуулийг ноцтой зөрчсөн гэж дүгнэжээ. Шүүгдэгчийн үйлдлийг Эрүүгийн хуулийн 145.1-ээр зүйлчилж, хөнгөн гэмт хэргийн хөөн хэлэлцэх хугацаа дууссан тул эрүүгийн хариуцлагаас чөлөөлж, хэргийг хэрэгсэхгүй болгохоор шийдвэрлэв.

ҮНДЭСЛЭЛ: Шүүх мөрдөн байцаалтын шатанд прокурорын хуульд заасан журмын дагуу хэрэгсэхгүй болгосон тогтоолыг хүчингүй болгох, хэргийг сэргээх, зүйлчлэлийг хүндрүүлэх эрхгүй. Шүүх хэргийг хэлэлцэх ажиллагааг зөвхөн шүүхэд шилжүүлсэн хэргийн хэмжээний дотор явуулах бөгөөд ялыг хүндрүүлэхээр хэргийг буцаах үндэслэл Эрүүгийн байцаан шийтгэх хуульд байхгүй. Иймд анхан шатны шүүх Эрүүгийн байцаан шийтгэх хуулийг ноцтой зөрчиж, шүүгдэгчийн эрх зүйн байдлыг дордуулсан тул давж заалдах шатны шүүх хэргийн зүйлчлэлийг Эрүүгийн хуулийн 145.1-ээр хөнгөрүүлэн, хөөн хэлэлцэх хугацаа дууссан үндэслэлээр шүүгдэгчийг эрүүгийн хариуцлагаас чөлөөлж, хэргийг хэрэгсэхгүй болгосон.