Тогтоол №3251

ХЭРГИЙН ТАНИЛЦУУЛГА: Яллагдагч Б.Т-, Ц.Х-, Н.Д- нар согтууруулах ундаа хэрэглэсэн үедээ бүлэглэн иргэн Л.Дэлгэрсайханыг амь насанд нь аюултай хүч хэрэглэн боож унаган, нийт 390.000 төгрөгийн эд зүйлийг дээрэмдсэн гэмт хэрэгт холбогджээ.

АНХАН ШАТ: Шүүх Б.Т-, Ц.Х-, Н.Д- нарыг бүлэглэж, бусдын эд хөрөнгийг авах зорилгоор амь биед нь аюултай хүч хэрэглэн довтолж, дээрэмдсэн гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 147.2-т зааснаар тус бүр 3 жил 4 сар 10 хоног хорих ял оногдуулж, жирийн дэглэмтэй хорих ангид эдлүүлэхээр, мөн тус бүр 50.000 төгрөгийг хураахаар шийдвэрлэсэн.

ДАВЖ ЗААЛДАХ ШАТ: Ялтан Б.Т-ын өмгөөлөгч анхан шатны шүүх хавтаст хэрэгт авагдсан нотлох баримтыг тал бүрээс нь судлалгүй, зөвхөн хохирогчийн мэдүүлэгт үндэслэн хэргийг шийдвэрлэсэн, Б.Т- нь дээрмийн гэмт хэрэгт санаа зорилготой оролцоогүй, үйлдлийн зүйлчлэлийг өөрчилж Эрүүгийн хуулийн 181.1-д зааснаар зүйлчлэхийг, хохирол төлсөн байдлыг харгалзан үзэхийг хүсэж гомдол гаргасан. Улсын яллагч анхан шатны шүүхийн тогтоолыг хэвээр үлдээхийг хүссэн. Давж заалдах шатны шүүх анхан шатны шүүхийн тогтоолыг хүчингүй болгож, нэмэлт мөрдөн байцаалтын ажиллагаа хийлгэхээр хэргийг прокурорт буцааж, цагдан хорих таслан сэргийлэх арга хэмжээг хэвээр үргэлжлүүлсэн.

ҮНДЭСЛЭЛ: Анхан шатны шүүхийн шийтгэх тогтоол нь Эрүүгийн байцаан шийтгэх хуулийн 284.1-д заасан хууль ёсны болон үндэслэлтэй байх шаардлагыг хангаагүй. Хохирогчийг хэн боож унагаасан, эд зүйлийг авахад ялтан Б.Т-, Н.Д-, Ц.Х- нар ямар байдлаар оролцсоныг нотлох баримтууд болох хохирогч, гэрч, сэжигтнүүдийн мэдүүлгүүд харилцан зөрүүтэй байхад мөрдөн байцаалтын шатанд хангалттай тогтоож чадаагүй. Мэдүүлгүүдийн зөрүүг арилгах, хуульд заасан ажиллагаануудыг хийгээгүй тул хэргийн бодит байдлыг бүрэн тогтооход эргэлзээтэй байна.