Тогтоол №3144

ХЭРГИЙН ТАНИЛЦУУЛГА: О.Батболд, Б.Билгүүн, Т.Мөнх-Эрдэнэ, Б.Алтансүх нар нь 2016 оны 9 дүгээр сарын 22-ны өдөр бүлэглэн хохирогч Э.Тэмүүжингийн амь биед аюултайгаар хүч хэрэглэн, гар хөлийг нь хүлж, “LG” гар утас, банкны карт зэрэг 40.000 төгрөгийн эд хөрөнгийг дээрэмдсэн хэрэгт холбогджээ. Прокуророос Эрүүгийн хуулийн тусгай ангийн 147 дугаар зүйлийн 147.2 дахь хэсэгт зааснаар яллах дүгнэлт үйлдэн шүүхэд шилжүүлсэн.

АНХАН ШАТ: Баянзүрх дүүргийн Эрүүгийн хэргийн анхан шатны шүүх О.Батболд, Б.Билгүүн, Т.Мөнх-Эрдэнэ, Б.Алтансүх нарыг бүлэглэн дээрэмдсэн гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 147 дугаар зүйлийн 147.2 дахь хэсэгт зааснаар О.Батболдыг 5 жил 6 сар, Б.Билгүүн, Т.Мөнх-Эрдэнэ, Б.Алтансүх нарыг тус бүр 5 жил 1 сарын хугацаагаар жирийн дэглэмтэй хорих ангид хорих ял оногдуулсан. Эд хөрөнгө хураах нэмэгдэл ял хэрэглээгүй, урьдчилан цагдан хоригдсон хугацааг ялд оруулан тооцжээ.

ДАВЖ ЗААЛДАХ ШАТ: Ялтан Б.Алтансүх, түүний өмгөөлөгч, ялтан О.Батболд, Т.Мөнх-Эрдэнэ нарын өмгөөлөгч, ялтан Б.Билгүүний өмгөөлөгч нар давж заалдах гомдол гаргасан. Гомдлууддаа, анхан шатны шүүх хэргийг нотлох баримтаар хангалтгүй үнэлсэн, гэмт хэргийн бүрэлдэхүүн байхгүй эсвэл гэмт хэрэг үйлдэхэд оролцсон нь нотлогдоогүй байхад цагаатгах тогтоол гаргаагүйг зөрчсөн, хохирогчийн мэдүүлэг зөрүүтэй бөгөөд худал болох нь тогтоогдсон, дээрэмдэх гэмт хэргийн үндсэн шинж болох эд хөрөнгө авах зорилго байхгүй байсан, харин хохирогч дугуй хулгайлсантай холбоотойгоор үүссэн үйлдэл байсан тул дээрмийн гэмт хэрэгт буруу зүйлчилсэн, яллагдагч нарын гэм бурууг тус тусад нь тогтоох шаардлагатай, хохирогчийн үйлдлийг хулгайн гэмт хэргийн шинжтэй гэж шалгаагүй орхигдуулсан гэж үзсэн. Хохирогч Э.Тэмүүжин өмгөөлөгчдийн гомдлыг эс зөвшөөрч, өөрийн халааснаас эд зүйлс авсан, зодуулсан нь үнэн, Батболдын дугуйг унаад явсан нь гар утсыг нь авах вий гэж айсандаа гэж тайлбарласан. Прокурор анхан шатны шүүхийн шийтгэх тогтоол үндэслэлтэй, хууль ёсны гарсан тул давж заалдах гомдлыг хэрэгсэхгүй болгож, тогтоолыг хэвээр үлдээх санал гаргасан.

ҮНДЭСЛЭЛ: Давж заалдах шатны шүүх анхан шатны шүүхийн шийтгэх тогтоол нь Эрүүгийн байцаан шийтгэх хуулийн 284.1-д заасан "шүүхийн тогтоол хууль ёсны ба үндэслэлтэй байна" гэсэн шаардлагыг хангаагүй гэж дүгнэв. Мөрдөн байцаалтын шатанд хэргийн талаар нотолбол зохих ажиллагааг бүрэн гүйцэд хийгээгүйгээс шүүх тогтоол гаргахад ач холбогдолтой зарим нөхцөл байдал тодорхой бус байна. Яллагдагчдын тухайн гэмт хэрэгт оролцсон оролцоо тус бүрийг нэг бүрчлэн шалгаагүй, хохирогч болон шүүгдэгч нарын үйлдлийн ялгааг гаргаж чадаагүй, хэргийн сэдэлт, гэм буруугийн хэлбэрийг зөв тогтоогоогүй байж дээрмийн гэмт хэрэг үйлдсэн гэж хавтгайруулан дүгнэсэн нь ойлгомжгүй байна. Гэмт хэргийн сэдэлтийг зөв тогтоосны эцэст хэргийг зүйлчилж, гэм буруугийн талаар дүгнэлт хийх шаардлагатай. Тухайлбал, нийлмэл гэмт хэрэг үйлдэгдсэн эсэх, дээрмийн гэмт хэрэг үйлдсэн бол эд хөрөнгө авах санаа зорилго, довтолгоон хэзээнээс эхэлсэн зэрэгт зайлшгүй дүгнэлт өгөх шаардлагатай байна. Иймд анхан шатны шүүхийн шийтгэх тогтоолыг хүчингүй болгож, хэргийг нэмэлт мөрдөн байцаалтын ажиллагаа хийлгэхээр прокурорт буцаахаар шийдвэрлэв.