Тогтоол №2843

ХЭРГИЙН ТАНИЛЦУУЛГА: Ялтан Я.Эрдэнэбат нь ялтай байх хугацаандаа согтууруулах ундаа хэрэглэсэн үедээ хохирогчтой үг маргалдсаны дараа, гэрээс гарч явж, архины шилний хагархайгаар хохирогчийн зүүн гарт шарх үүсгэн танхайрсан гэмт хэрэгт холбогджээ. Сүхбаатар дүүргийн прокурорын газраас Эрүүгийн хуулийн 181.3-т зааснаар зүйлчлэн яллах дүгнэлт үйлджээ.

АНХАН ШАТ: Сүхбаатар дүүргийн Эрүүгийн хэргийн анхан шатны шүүх ялтан Я.Эрдэнэбатыг ялтай байх хугацаандаа, бусдыг илтэд үл хүндэтгэн, нийгмийн хэв журмыг ноцтой зөрчиж, зэвсгийн чанартай зүйл хэрэглэж танхайрсан гэм буруутайд тооцож, Эрүүгийн хуулийн 181.3-т зааснаар 5 жил 1 сарын хорих ял оногдуулсан. Өмнөх ялын үлдэх хэсэгтэй нэгтгэн, нийт 5 жил 6 сарын хорих ялыг чанга дэглэмтэй хорих ангид эдлүүлэхээр шийдвэрлэсэн.

ДАВЖ ЗААЛДАХ ШАТ: Ялтан Я.Эрдэнэбат нь хохирогч өдөж, өөрийгөө хамгаалах зорилгоор цохьсон тул гэмт хэргийн зүйлчлэлийг хөнгөрүүлэхийг, мөн хохирогч болон гэрчүүд худал мэдүүлэг өгсөн гэж гомдол гаргасан. Өмгөөлөгч нь мөрдөн байцаалтын явцад хууль зөрчигдсөн, ялтан бичиг үсэг мэдэхгүй байсан, хохирогчийн мэдүүлэг эргэлзээтэй, прокурор шүүх хуралдаан дээр хэргийн зүйлчлэлийг хөнгөрүүлэн өөрчилснийг анхан шатны шүүх хүндрүүлэн шийдвэрлэсэн нь хууль зөрчсөн тул шийтгэх тогтоолыг хүчингүй болгохыг хүссэн. Прокурор нь гэрчүүдийн мэдүүлэг хуульд нийцсэн, зүйлчлэлийг хөнгөрүүлэхэд татгалзах зүйлгүй гэж санал хэлсэн боловч өөрөө зүйлчлэлийг өөрчлөөгүй, ялтан бичиг үсэг мэдэхгүй гэх нь үндэслэлгүй гэж тайлбарлан, анхан шатны шүүхийн тогтоолыг хэвээр үлдээхийг хүссэн.

ҮНДЭСЛЭЛ: Давж заалдах шатны шүүх анхан шатны шүүхийн тогтоолыг хууль ёсны бөгөөд үндэслэлтэй гэж үзэв. Согтууруулах ундаа хэтрүүлэн хэрэглэж, хохирогчтой маргалдсан боловч маргаан дууссаны дараа ялтан гэрээс гарч явж, шилний хагархай барьж ирэн хохирогчид гэмтэл учруулсан нь тогтоогдсон. Энэ үйлдлийг хувийн таарамжгүй харилцаанаас бус, согтуурсан байдлаас үүдсэн танхайн сэдэлттэй гэж дүгнэсэн нь үндэслэлтэй байна. Ялтан бичиг үсэг мэдэхгүй гэх гомдлыг хэргийн баримтуудад өөрийн гараар бичиж, гарын үсэг зурж, агуулгыг ойлгож байсан зэргээр няцааж, Эрүүгийн байцаан шийтгэх хуулийн 40.1.3-т заасан шаардлагыг хангаагүй гэж үзэв. Прокурор шүүх хуралдаан дээр хэргийн зүйлчлэлийг хөнгөрүүлэн өөрчилсөн гэх гомдол нь шүүх хуралдааны тэмдэглэлээр батлагдаагүй тул үндэслэлгүй. Ялтан ялтай байх хугацаандаа гэмт хэрэг үйлдсэн тул Эрүүгийн хуулийн 61.3, 58 дугаар зүйлд зааснаар ялыг нэгтгэсэн нь хууль зүйн үндэслэлтэй. Мөрдөн байцаалт, шүүх хянан шийдвэрлэх ажиллагааны явцад хууль зөрчөөгүй, Эрүүгийн хуулийг зөв хэрэглэсэн тул анхан шатны шүүхийн тогтоолыг хэвээр үлдээж, давж заалдах гомдлуудыг хэрэгсэхгүй болгожээ.