Тогтоол №3184

ХЭРГИЙН ТАНИЛЦУУЛГА: Ялтан С.Э. согтууруулах ундаа хэрэглэсэн үедээ хамтран амьдрагчаа өмгөөлөн А.А-ын хүзүүнд архины шилээр зүсэж хүнд гэмтэл санаатай учруулсан. Ялтан А.А. согтууруулах ундаа хэрэглэсэн үедээ үл ялих зүйлээр шалтаглан архины шилийг зэвсгийн чанартай ашиглан хохирогч Д.Баатарсүрэнгийн эрүүнд зүсэж хөнгөн гэмтэл санаатай учруулж танхайрсан. Прокурор С.Э-д Эрүүгийн хуулийн тусгай ангийн 96.1, А.А-д Эрүүгийн хуулийн тусгай ангийн 181.3-аар яллах дүгнэлт үйлджээ.

АНХАН ШАТ: Шүүх С.Э-ийг бусдын биед хүнд гэмтэл санаатай учруулсан, А.А-ыг зэвсгийн чанартай зүйл хэрэглэн танхайрсан гэм буруутайд тооцсон. С.Э-т Эрүүгийн хуулийн тусгай ангийн 96.1-ээр 5 жил 1 сар, А.А-д Эрүүгийн хуулийн тусгай ангийн 181.3-аар 5 жил 10 хоног хорих ял тус тус оногдуулж, ялыг жирийн дэглэмтэй хорих ангид эдлүүлэхээр шийдвэрлэсэн.

ДАВЖ ЗААЛДАХ ШАТ: Ялтан А.А. давж заалдах гомдолдоо тухайн үед согтуу байгаагүй, хэргийн зүйлчлэлийг хүндрүүлсэн, гэмтлийн шалтгаан тодорхойгүй гэж маргасан. Прокурор анхан шатны шийдвэрийг хэвээр үлдээхийг хүссэн. Давж заалдах шатны шүүх анхан шатны шүүхийн шийтгэх тогтоолыг хэвээр үлдээж, А.А-ын давж заалдах гомдлыг хэрэгсэхгүй болгосон.

ҮНДЭСЛЭЛ: Анхан шатны шүүхийн дүгнэлт нь хууль ёсны бөгөөд үндэслэлтэй байсан. Ялтан А.А-ын гомдол нь хохирогчийн болон гэрч нарын мэдүүлэг, шинжээчийн дүгнэлт болон бусад нотлох баримтуудаар няцаагдаж, түүний үйлдсэн хэрэг танхайрсан болох нь тогтоогдсон. Мөрдөн байцаалтаар хэргийн бүх асуудлыг бүрэн тогтоосон бөгөөд анхан шатны шүүхийн зүйлчлэл болон оногдуулсан ял шийтгэлийн төрөл, хэмжээ нь гэмт хэргийн шинж байдал, гэм буруутай тохирсон тул ял хөнгөрүүлэх, зүйлчлэлийг өөрчлөх хууль зүйн үндэслэлгүй гэж давж заалдах шатны шүүх дүгнэсэн.