Тогтоол №14658

ХЭРГИЙН ТАНИЛЦУУЛГА: Хэд хэдэн яллагдагчийг хууль түүнд нийцүүлэн гаргасан захиргааны хэм хэмжээний акт, хөдөлмөрийн гэрээ, ажлын байрны тодорхойлолтод заасан ажил үүргээ биелүүлээгүй, усны худгийг тагжуулаагүй, засвар үйлчилгээ хийгээгүйн улмаас хүүхдийн нас баралтын гэмт хэрэгт холбогдуулан шалгасан.

АНХАН ШАТ: Хэргийг прокурорт буцааж, яллагдагч нарт авсан хувийн баталгаа гаргах таслан сэргийлэх арга хэмжээг хэвээр үлдээсэн. Үүнд, яллагдагч нарт яллах дүгнэлтийн хувийг гардуулсан эсэх нь тодорхойгүй, яллагдагчийн эрхийг хязгаарласан, мөн шинжээч томилсон тогтоол, дүгнэлтийг оролцогч нарт танилцуулаагүй зэрэг нь Эрүүгийн хэрэг хянан шийдвэрлэх тухай хуулийг зөрчсөн гэж үзсэн.

ДАВЖ ЗААЛДАХ ШАТ: Прокурор анхан шатны шүүгчийн захирамжийг эс зөвшөөрч, яллах дүгнэлтийг яллагдагч нарт гардуулсан нь нотлогдсон, шинжээчийн дүгнэлтийг танилцуулахдаа хууль зөрчөөгүй, ажлын байрны тодорхойлолт, хөдөлмөрийн гэрээ зэрэг баримтууд хавтаст хэрэгт бүрэн авагдсан байхад хэргийг прокурорт буцаасан нь үндэслэлгүй гэж маргасан. Өмгөөлөгчид анхан шатны шүүхийн захирамжийг дэмжиж, гэмт хэргийн байдал, шалтгаан нөхцөл, гэм бурууг тогтоож чадаагүй, яллах дүгнэлтийг гардуулсан эсэх нь маргаантай, шинжээч томилсон, танилцуулсан үйлдлүүд хууль зөрчсөн, яллагдагчаар татах тогтоол үйлдсэний дараа хуульд заасан хугацаанд мэдүүлэг аваагүй зэрэг үндэслэлээр буцаасан нь зөв гэж үзсэн.

ҮНДЭСЛЭЛ: Давж заалдах шатны шүүхээс анхан шатны шүүгчийн захирамжийг хэвээр үлдээж, прокурорын эсэргүүцлийг хэрэгсэхгүй болгосон. Шүүгчийн захирамж нь Эрүүгийн хэрэг хянан шийдвэрлэх тухай хуулийн 16.2-т заасан гэмт хэргийн байдал, үйлдсэн этгээд, учруулсан хохирол, нөлөөлсөн шалтгаан, нөхцөл байдлыг бүрэн тогтоогоогүй, яллах дүгнэлтийг гардуулсан эсэх нь тодорхойгүй, шинжээчийн дүгнэлттэй танилцах зэрэг оролцогчийн эрхийг зөрчсөн үндэслэлүүдийг зөв гэж үзсэн. Хэргийг шийдвэрлэхэд мэргэшсэн инженерүүдийн хамтарсан шинжээчдийн дүгнэлт чухал гэж үзсэн.