Тогтоол №14597

ХЭРГИЙН ТАНИЛЦУУЛГА: Шүүгдэгч нь тусгай хамгаалалттай газрын даргын албан үүргийг түр орлон гүйцэтгэгчээр ажиллаж байхдаа байгаль хамгаалагчийн пост барих ажлын хөрөнгө оруулалтад шаардлага хангахгүй бараа бүтээгдэхүүн ашиглан төсөвт өртгийг бүрдүүлж, улсад хохирол учруулсан гэмт хэрэгт холбогджээ. АНХАН ШАТ: Шүүгдэгчийн үйлдсэн гэмт хэргийн шинжийг тогтооход шаардлагатай нөхөн мөрдөн шалгах ажиллагааг хийлгэх, мөрдөн шалгах ажиллагаа явуулахдаа Эрүүгийн хэрэг хянан шийдвэрлэх тухай хуулийг ноцтой зөрчсөн байдлыг тогтоож, хэргийг прокурорт буцаасан. ДАВЖ ЗААЛДАХ ШАТ: Прокурор нь анхан шатны шүүхийн шийдвэрийг эс зөвшөөрч, шүүгдэгчийн үйлдлийг тогтооход шаардлагатай мөрдөн шалгах ажиллагаа хангалтгүй хийгдсэн, шүүхийн шийдвэр үндэслэлгүй, хэргийн бодит байдалд нийцээгүй гэж үзэн эсэргүүцэл гаргасан. Өмгөөлөгч нь мөрдөн шалгах ажиллагаа хангалттай хийгдээгүй, улсад учирсан хохирлыг шүүгдэгчийн үйлдлээс болсон гэдгийг тогтоож чадаагүй учраас анхан шатны шүүхийн шийдвэр үндэслэлтэй гэж үзсэн.

ҮНДЭСЛЭЛ: Байгаль хамгаалагчийн пост нь "барилга байгууламж" гэх ойлголтод хамаарах эсэх, уг постыг барьсан бараа материалуудын шинжийг тодорхойлж, уг бараа материал тухайн постыг барихад тавигдах шаардлагыг хангаж байсан эсэхийг тогтоох, тухайн пост нурсан нь ашигласан бараа материалын чанараас шалтгаалсан уу, эсхүл угсралтыг чанаргүй хийж гүйцэтгэснээс шалтгаалсан уу гэдгийг тогтоох, шүүгдэгч нь хэдэн төгрөг завшсан зэргийг бодитой тогтоох нь гэмт хэргийн шинжийг тогтооход чухал ач холбогдолтой. Төсвийн хөрөнгийг зориулалтын бусаар зарцуулах гэмт хэрэг нь Төсвийн тухай хууль, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд заасан журам, улсын эдийн засгийн аюулгүй байдалд халддаг нийгэмд аюултай гэм буруутай үйлдэл юм. Мөрдөн шалгах ажиллагааг явуулахдаа хэргийг хянан шийдвэрлэхэд чухал ач холбогдолтой байж болох нөхцөл байдлыг бүрэн тодруулахгүй орхигдуулсан нь хэргийн бодит байдлыг тогтоох боломжгүй болсон. Мөрдөгч, прокурор нь нотлох баримтыг тал бүрээс нь бүрэн бодитойгоор шалгаж хянасны үндсэн дээр хэргийн бодит байдлыг тогтоох үүрэгтэй бөгөөд энэ үүргийг биелүүлээгүй нь хэргийг прокурорт буцаах үндэслэл болсон. Анхан шатны шүүхийн шийдвэрийг хэвээр үлдээж, прокурорын эсэргүүцлийг хэрэгсэхгүй болгосон.