Тогтоол №14387

ХЭРГИЙН ТАНИЛЦУУЛГА: Албан тушаалаа урвуулан ашиглаж, байгууллагын мөнгөн хөрөнгийг хувьдаа завшсан хэрэгт холбогдсон шүүгдэгчийг цагаатгах эсвэл яллах нь тодорхойгүй тул анхан шатны шүүх хэргийг нэмэлт мөрдөн шалгах ажиллагаа явуулахаар прокурорт буцаасан. Прокурор уг шийдвэрийг эсэргүүцсэн.

АНХАН ШАТ: Шүүгдэгчийн үйлдлийг Эрүүгийн хуулийн ерөнхий болон тусгай ангийн зүйлчлэлээр тогтоох боловч үйлдсэн гэмт хэргийн улмаас учирсан хохирлыг нарийвчлан тогтоох, мөн үйлдлийн зорилго, гэм буруугийн хэлбэрийг бүрэн шалгах шаардлагатай гэж үзэн хэргийг прокурорт буцаах шүүгчийн захирамж гаргасан.

ДАВЖ ЗААЛДАХ ШАТ: Прокурор шүүгчийн захирамжийг эсэргүүцсэн. Давж заалдах шатны шүүх анхан шатны шүүхийн дүгнэлтийг хууль зүйн үндэслэлтэй гэж үзэн, хэргийг бүхэлд нь хянаж, мөрдөн шалгах ажиллагаа хангалтгүй хийгдсэн, хэргийн бодит байдлыг тогтооход шаардлагатай нотлох баримтууд дутуу байна гэж дүгнэн, прокурорын эсэргүүцлийг хэрэгсэхгүй болгож, анхан шатны шүүхийн захирамжийг хэвээр үлдээсэн.

ҮНДЭСЛЭЛ: Шүүх хэрэгт авагдсан нотлох баримтад тулгуурлан хэргийн үйл баримтыг тогтоохдоо хэрэгт хамааралтай нотлох баримтыг тал бүрээс нь нягт нямбай, бүрэн гүйцэд, бодит байдлаар хянаж эрх зүйн дүгнэлт хийж хэргийг шийдвэрлэх үүрэгтэй. Гэмт хэрэгт мөрдөн шалгах ажиллагаа бүрэн биш хийгдсэн, хэргийг хянан шийдвэрлэхэд ач холбогдол бүхий нөхцөл байдлуудыг дутуу тогтоосон, өөрөөр хэлбэл нотолбол зохих байдлуудыг бүрэн шалгаж тогтоогоогүй байх тул анхан шатны шүүхийн шүүгчийн захирамжид дурдсан асуудлаар мөрдөн шалгах ажиллагааг нэмж хийх нь зүйтэй. Нотлох баримтын хүрэлцээтэй байдал нь шүүгдэгчийн гэм бурууг бүрэн баталж чадах нотлох баримтын хэмжээ хязгаар бөгөөд шүүх нотлох баримтын хүрэлцээтэй байдал бүрдсэн үед хэргийг хэлэлцэж, нотлох баримтын хангалттай байдалд үндэслэн хэргийн нөхцөл байдлыг тал бүрээс нь бүрэн тогтоох нь шүүхээс хууль ёсны ба үндэслэлтэй шийдвэр гаргахад чухал нөлөө үзүүлдэг. Гэмт үйлдлийн төрөл, аргыг зөв тодорхойлох нь хэргийн бодит байдлыг тогтоох, хэргийн зүйлчлэл, гэм буруу, ялын тохироо, хохирлын асуудлыг зөв тогтоож шийдвэрлэхэд чухал ач холбодолтой.