Тогтоол №13075

ХЭРГИЙН ТАНИЛЦУУЛГА: Банкны харилцааны менежер байсан этгээд нь хуурамч баримт бичиг, цахим хэрэгсэл ашиглан банкны журмыг зөрчин, бусдын нэр дээр кредит карт нээлгэж, зээлийн эрхийг нь дур мэдэн нэмэгдүүлэн, нийт их хэмжээний мөнгийг шилжүүлэн авч, банкыг төөрөгдөлд оруулан их хэмжээний хохирол учруулсан гэх хэрэг. АНХАН ШАТ: Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2-т заасан "баримт бичиг, цахим хэрэгсэл ашиглаж бодит байдлыг нуух замаар бусдыг төөрөгдөлд оруулан хуурч өмчлөгчийн эд хөрөнгийг шилжүүлэн их хэмжээний хохирол учруулан үйлдсэн" гэмт хэрэгт гэм буруутайд тооцож, 4 жилийн хорих ял оногдуулж, учирсан хохирлыг гаргуулж шийдвэрлэсэн. ДАВЖ ЗААЛДАХ ШАТ: Шүүгдэгч болон түүний өмгөөлөгч нар хэргийн зүйлчлэл, учирсан хохирлын хэмжээ тодорхой бус, санхүүгийн дүгнэлт хангалтгүй, хууль бус шинжээчийн дүгнэлтэд үндэслэсэн гэх үндэслэлээр анхан шатны шүүхийн шийтгэх тогтоолыг эс зөвшөөрч гомдол гаргасан. Давж заалдах шатны шүүх хэргийг бүхэлд нь хянан үзээд, нотлох баримтууд нь хэргийн бодит байдалтай нийцсэн, буруутай үйлдлийг Эрүүгийн хуулийн холбогдох зүйлээр зүйлчилсэн нь хууль зүйн үндэслэлтэй гэж үзэн гомдлыг хэрэгсэхгүй болгож, анхан шатны шүүхийн шийтгэх тогтоолыг хэвээр үлдээсэн.

ҮНДЭСЛЭЛ: Этгээд нь банкны харилцааны менежер албан тушаалаа урвуулан ашиглаж, хуурамч баримт, цахим хэрэгсэл ашиглан банкны журмыг зөрчиж, бусдын нэр дээр кредит карт нээлгэн, зээлийн эрхийг дур мэдэн нэмэгдүүлж, банкыг төөрөгдөлд оруулан их хэмжээний хохирол учруулсан болох нь дотоод аудит, хохирогчийн төлөөлөгчийн мэдүүлэг, гэрч болон бусад баримтаар тогтоогджээ. Банкны харилцааны менежер нь шийдвэр гаргах эрх бүхий албан тушаалтан биш, зээлийн эрхийг нэмэх, хасах, өөрчлөх, программ дээр өөрчлөлт оруулах чиг үүрэгтэй тул тус этгээдийн үйлдлийг завших гэмт хэргийн шинжгүй, харин залилах гэмт хэрэгт тооцох нь үндэслэлтэй болно. Анхан шатны шүүхээс Эрүүгийн хуулийн ерөнхий ангийн хэм хэмжээг зөв баримтлан, гэм буруу, хохирлын хэмжээ, шүүгдэгчийн хувийн байдал зэргийг харгалзан оногдуулсан ял нь хууль зүйн үндэслэлтэй байна. Шинжээчийн дүгнэлт нь санхүүгийн анхан шатны баримт, аудитын дүгнэлтэд тулгуурласан бөгөөд хууль зөрчсөн гэж үзэх үндэслэлгүй.