Тогтоол №11842

ХЭРГИЙН ТАНИЛЦУУЛГА: Шүүгдэгч согтуугаар тээврийн хэрэгсэл жолоодож, замын хөдөлгөөний дүрмийг зөрчин, зам тээврийн осол гаргаж, хохирогчийн эрүүл мэндэд хүндэвтэр хохирол учруулсан. АНХАН ШАТ: Шүүгдэгчийг Эрүүгийн хуулийн тусгай ангийн 27.10 дугаар зүйлийн 2.1-д заасан гэмт хэрэгт буруутгаж, тээврийн хэрэгсэл жолоодох эрхийг 3 жилээр хасч, 6 сар хорих ялаар шийтгэж, нээлттэй хорих байгууллагад эдлүүлэхээр шийдвэрлэсэн. ДАВЖ ЗААЛДАХ ШАТ: Шүүгдэгч болон түүний өмгөөлөгч нь хөнгөн гэмт хэрэгт тооцож, учруулсан хохирлыг бүрэн барагдуулсан, анх удаа тохиолдлын шинжтэй гэмт хэрэг үйлдсэн, гэм буруугаа ухамсарлаж байгаа зэргийг харгалзан хорих ялыг биечлэн эдлүүлэхгүй тэнсэж өгөхийг хүссэн. ҮНДЭСЛЭЛ: Хүндэвтэр хохирол учруулсан хэрэг нь хөнгөн гэмт хэрэгт хамаарах болон шүүгдэгчийн үйлдсэн хэргийн нийгмийн аюулын шинж, нөхцөл байдал, хувийн байдлыг харгалзан үзэж, хохирлыг бүрэн барагдуулсан тул хорих ял оногдуулахгүйгээр 6 сарын хугацаагаар тэнсэж, тэнссэн хугацаанд согтууруулах ундааны зүйл хэрэглэхийг хориглох хязгаарлалт тогтоож, анхан шатны шүүхийн шийтгэх тогтоолд өөрчлөлт оруулж шийдвэрлэсэн.