Тогтоол №11515

ХЭРГИЙН ТАНИЛЦУУЛГА: Гэр бүлийн хамаарал бүхий хамтран амьдрагч хоорондоо архидан согтуурч байх үед хардалтын улмаас нэг нь нөгөөгийнхөө биед хүнд хохирол санаатай учруулсан хэрэг. АНХАН ШАТ: Хүний эрүүл мэндэд хүнд хохирол санаатай учруулсан гэм буруутайд тооцож, Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.4-т зааснаар 3 жил 5 сарын хорих ялаар шийтгэсэн. ДАВЖ ЗААЛДАХ ШАТ: Шүүгдэгчийн өмгөөлөгч нь шүүгдэгч оюуны хомсдолтой, үйлдлээ удирдан жолоодох чадваргүй, энэ нь хэргийг хариуцах чадварт нь нөлөөлсөн гэж үзэн ялыг хөнгөрүүлэхийг хүссэн. Гэвч шүүх холбогдох шинжээчийн дүгнэлт, гэрч, хохирогчийн мэдүүлгийг үндэслэн өмгөөлөгчийн гомдлыг хэрэгсэхгүй болгож, анхан шатны шүүхийн шийтгэх тогтоолыг хэвээр үлдээсэн.

ҮНДЭСЛЭЛ: Шинжээчийн дүгнэлтээр шүүгдэгч оюуны хөнгөн хомсдолтой боловч үйлдлээ удирдан жолоодох, хэрэг хариуцах чадвартай гэж тогтоогдсон. Хэрэгт авагдсан нотлох баримтууд, мэдүүлгүүд нь анхан шатны шүүхийн дүгнэлтийг хэргийн бодит байдалтай нийцсэн гэдгийг баталсан. Шүүгдэгчийн үйлдсэн хэрэг Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.4-т заасан гэмт хэргийн шинжийг бүрэн агуулсан, оногдуулсан ял нь шударга ёсны зарчимд нийцсэн гэж үзсэн.