Шүүхийн тогтоол #1276

ХЭРГИЙН ТАНИЛЦУУЛГА: Үл хөдлөх эд хөрөнгийн бүртгэлийг хууль бус болохыг тогтоож, өмчлөх эрхийн гэрчилгээг хүчингүй болгуулах шаардлагатай. АНХАН ШАТ: Нийслэл дэх Захиргааны хэргийн анхан шатны шүүхээс нэхэмжлэлийг бүхэлд нь хэрэгсэхгүй болгосон. Хуулийн зүйл заалт: Улсын бүртгэлийн ерөнхий хууль, Үл хөдлөх эд хөрөнгийн бүртгэлийн тухай хуулийг баримталсан. ДАВЖ ЗААЛДАХ ШАТ: Захиргааны хэргийн давж заалдах шатны шүүхээс анхан шатны шүүхийн шийдвэрийн зарим хэсгийг өөрчилж, нэхэмжлэлийн шаардлагыг хэрэгсэхгүй болгосон. Гомдол гаргагч: "Т" ТББ. Гомдлын шалтгаан: Шүүхийн шийдвэр нь хуульд нийцээгүй, бодит байдлыг хангаагүй, хэргийн бодит нөхцөл байдлыг тал бүрээс нь бүрэн дүүрэн хянах эрх бүхий шүүх нь хүсэлтийг хангаагүй, зарим шүүхийн шийдвэрийг баримтлаагүй гэж үзсэн. ХЯНАЛТЫН ШАТ: Улсын Дээд шүүхээс давж заалдах шатны шүүхийн магадлалыг хэвээр үлдээж, нэхэмжлэгчийн гомдлыг хангахгүй орхисон. Гомдол гаргагч: Нэхэмжлэгчийн өмгөөлөгч. Гомдлын шалтгаан: Процессын зөрчилтэй, шүүхийн шийдвэр нь бодит байдлыг хангаагүй, нэхэмжлэлийн шаардлагыг бүрэн тодруулж, дүгнэлт хийгээгүй, зарим шүүхийн шийдвэрийг баримтлаагүй гэж үзсэн. ҮНДЭСЛЭЛ: 1. Захиргааны байгууллагын бүртгэлийн улмаас иргэдийн эрх, ашиг сонирхол зөрчигдөөгүй. 2. Нэхэмжлэгчийн дурдсан эрхийн зөрчлүүд нь захиргааны байгууллагын бүртгэлээс бус, түрээслүүлэгч этгээдийн үйл ажиллагаанаас үүдэлтэй. 3. Маргаан бүхий үл хөдлөх эд хөрөнгийн бүртгэл нь тухайн үед хүчин төгөлдөр байсан хуулийг зөрчөөгүй тул хууль бус гэж үзэх үндэслэлгүй. 4. Бүртгэл алдаатай байсан ч нэхэмжлэгчийн эрх, хууль ёсны ашиг сонирхол хөндөгдөхгүй. 5. Хөрөнгийн эрхийн улсын бүртгэлийг хууль бус гэсэн үндэслэлээр хүчингүй болгохыг шаардах эрх нь тухайн хөрөнгийг өмчлөх эрхтэй гэж маргах этгээдэд хамаарахаас бус түрээслэгч этгээдэд хамааралгүй. 6. 1971 оны протоколыг хүчин төгөлдөр бус гэж үзэх үндэслэлгүй, улмаар түүнийг үндэслэн бүртгэл хийсэн гэж хариуцагчийг буруутгах боломжгүй. 7. Процессын зөрчилтэй гэж үзэх хэрэг хянан шийдвэрлэх ажиллагааны зөрчлүүд нь шүүхийн шийдвэрт нөлөөлөхүйц бус. 8. Анхан болон давж заалдах шатны шүүхийн шийдвэрүүд нь хууль ёсны бөгөөд үндэслэл бүхий байна.