Тогтоол №1152

ХЭРГИЙН ТАНИЛЦУУЛГА: Нэхэмжлэгч нь байгууллагын улсын байцаагчийн үйлдсэн актыг хүчингүй болгуулахаар нэхэмжилсэн. Нэхэмжлэгч нь ажлаас буруу халсан нь тогтоогдож, ажилгүй байсан хугацааны олговор авсан бөгөөд энэ хугацаанд авсан ажилгүйдлийн тэтгэмжээ буцаан төлөх акт тогтоогдсонтой холбогдуулан маргасан. АНХАН ШАТ: Нийгмийн даатгалын тухай хуулийн 20 дугаар зүйлийн 2 дахь хэсгийг үндэслэн, улсын байцаагчийн актыг хүчингүй болгуулах тухай нэхэмжлэлийг хэрэгсэхгүй болгосон. ДАВЖ ЗААЛДАХ ШАТ: Анхан шатны шүүхийн шийдвэрийг хэвээр үлдээж, нэхэмжлэгчийн гомдлыг хангахгүй орхисон. ХЯНАЛТЫН ШАТ: Шүүх бүрэлдэхүүн нэхэмжлэгчийн хяналтын журмаар гаргасан гомдлыг хангалгүй орхиж, анхан болон давж заалдах шатны шүүхийн шийдвэр, магадлалыг хэвээр үлдээсэн. ҮНДЭСЛЭЛ:

• Ажилгүйдлийн тэтгэмж олгох журмын дагуу, шүүхээр хууль бусаар ажлаас халагдсан нь тогтоогдож, ажилгүй байсан хугацааны цалинг нөхөн олгосон тохиолдолд тухайн даатгуулагчийн ажилгүй байх хугацаанд авсан ажилгүйдлийн тэтгэмжийг буцаан төлүүлэхээр зохицуулсан нь хууль тогтоогчоос шилжүүлсэн эрхийн хүрээнд гаргасан хүчин төгөлдөр эрх зүйн эх сурвалж бөгөөд Нийгмийн даатгалын тухай хууль болон Ажилгүйдлийн тэтгэмжийн тухай хуулийг зөрчөөгүй байна.
• Шүүхийн шийдвэрээр ажлаас буруу халсан нь тогтоогдож, ажилгүй байсан хугацааны олговор болон нийгмийн даатгалын шимтгэлийг ажил олгогчоор төлүүлэх шийдвэр биелэгдсэнээр нэхэмжлэгчийн хөдөлмөрийн харилцаа хэвийн байдалдаа эргэж сэргээгдсэн, өөрөөр хэлбэл, тэтгэмж авах "ажилгүй" гэх нөхцөл болон тэтгэмжийн зорилго арилсан байна.
• Нэхэмжлэгчийн "шүүхийн шийдвэрийн дагуу ажилдаа эргүүлэн тогтоогдоход өмнө нь халсан тушаалыг хүчингүй гээгүй бөгөөд тухайн өдрөөс эхлэн хөдөлмөрийн гэрээг шинэчлэн хийсэн, авсан нөхөн төлбөр нь цалин гэж тооцогдож нийгмийн даатгалын шимтгэл ногдох байсан" гэх зэрэг үндэслэл нь маргаан бүхий акттай шууд хамааралгүй болно.