Тогтоол №907

ХЭРГИЙН ТАНИЛЦУУЛГА: Нэхэмжлэгч компани нь барилгын ажлын тендерт оролцож, дахин үнэлгээгээр хамгийн сайн тендерээр шалгарсан. Захиалагч гэрээ байгуулах эрх олгох мэдэгдлийг тендерийн хүчинтэй хугацаа дуусахаас өмнө илгээсэн боловч, гэрээ байгуулахыг ажлын таваас доошгүй хоногийн дараа ирэхийг шаардсан. Гэвч нэхэмжлэгчийг гэрээ байгуулахаар очиход тендерийн хүчинтэй хугацаа дууссан гэх үндэслэлээр гэрээ байгуулахаас татгалзсан тул нэхэмжлэгч гэрээ байгуулахыг даалгахаар нэхэмжилжээ.

АНХАН ШАТ: Анхан шатны шүүх нэхэмжлэлийг бүхэлд нь хэрэгсэхгүй болгож, тендерийн хүчинтэй хугацаанд гэрээ байгуулаагүй тул тендер шалгаруулалт хуульд заасан журмаар явагдаагүй гэж үзсэн.

ДАВЖ ЗААЛДАХ ШАТ: Нэхэмжлэгч давж заалдах гомдол гаргаж, хариуцагч тендерийн үнэлгээ болон гэрээ байгуулах шийдвэрийг хуулийн хугацаанд хийгээгүй, тендерийн ажиллагаа түдгэлзсэн хугацааг хүчинтэй байх хугацаанд тооцоогүй зэрэг үндэслэлийг дурдсан. Давж заалдах шатны шүүх анхан шатны шүүхийн шийдвэрийг хүчингүй болгож, нэхэмжлэлийг хангасан.

ҮНДЭСЛЭЛ: Захиалагч тендерийн хүчинтэй хугацаа дуусахад гурав хоног үлдсэн байхад гэрээ байгуулах эрх олгох мэдэгдлийг ажлын таваас доошгүй хоногийн дараа гэрээ байгуулахаар ирэхийг шаардан илгээж, улмаар хүчинтэй хугацаа дууссан шалтгаанаар гэрээ байгуулахаас татгалзсан нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн заалтыг зөрчиж, нэхэмжлэгчийн эрх ашгийг хохироосон. Тендерийн үнэлгээг хуулийн хугацаанд хийгээгүй, захиалагч худалдан авах ажиллагааг хуульд нийцүүлэн зохион байгуулж, хяналт тавих үүргээ биелүүлээгүй. Сангийн яамнаас тендерийн ажиллагааг түдгэлзүүлсэн хугацааг тендерийн хүчинтэй хугацаанд нэмж тооцох хууль зүйн үндэслэлтэй байхад анхан шатны шүүх харгалзан үзээгүй нь буруу дүгнэлт хийсэн. Иймд захиалагчийн гэрээ байгуулаагүй эс үйлдэхүйг хууль бус гэж тогтоож, гэрээ байгуулахыг даалгав.