Тогтоол №7811

ХЭРГИЙН ТАНИЛЦУУЛГА: "ДХ" ХХК нь Эрчим хүчний зохицуулах хорооны тогтоол, тусгай зөвшөөрөл сунгахаас татгалзсан шийдвэрийг хууль бус болохыг тогтоолгож, шийдвэрийг нь хүчингүй болгон, тусгай зөвшөөрлүүдийн хугацааг сунгахыг Эрчим хүчний зохицуулах хороонд даалгахыг шаарджээ. АНХАН ШАТ: Эрчим хүчний тухай хууль, Зөвшөөрлийн тухай хууль, Захиргааны ерөнхий хуулийн холбогдох зүйл заалтыг баримтлан, Эрчим хүчний зохицуулах хорооны тусгай зөвшөөрөл сунгахаас татгалзсан тогтоолыг дахин шинэ акт гаргах хүртэл 3 сарын хугацаатай түдгэлзүүлсэн. ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч анхан шатны шүүхийн шийдвэрийг эсэргүүцэж, Эрчим хүчний зохицуулах хорооны тогтоол нь хууль зүйн үндэслэлтэй, хуулийг зөв хэрэглэсэн, тусгай зөвшөөрлийн нөхцөл шаардлагыг биелүүлээгүй тул хугацааг сунгахаас татгалзсан нь хууль ёсны гэж үзжээ. Шүүх хариуцагчийн гомдлыг хангаж, анхан шатны шүүхийн шийдвэрт нэхэмжлэлийн шаардлагыг бүхэлд нь хэрэгсэхгүй болгосон өөрчлөлт оруулж, шийдвэрлэсэн.

ҮНДЭСЛЭЛ: "ДХ" ХХК нь гэрээ болон хуулиар хүлээсэн үүргээ биелүүлээгүй, дулааны төлбөрөө төлөөгүй, хэрэглэгчдийн гомдлыг шийдвэрлээгүй зэрэг зөрчлүүд гаргасан нь тогтоогдсон. Эрчим хүчний зохицуулах хороо нь тусгай зөвшөөрөл олгох, өөрчлөлт оруулах, цуцлах, нөхцөл шаардлагыг тогтоох, хэрэгжилтийг хянах, хугацааг сунгах эсэхийг шийдвэрлэх бүрэн эрхтэй. "ДХ" ХХК-ийн нөхцөл шаардлагын биелэлтийг "хангалтгүй" үнэлсэн, үүрэг даалгаврыг хангалтгүй биелүүлсэн, хуульд заасан нөхцөл шаардлагыг хангаагүй нь тогтоогдож байсан тул тусгай зөвшөөрлийг сунгахаас татгалзсан нь үндэслэлтэй гэж үзсэн.