Тогтоол №714

ХЭРГИЙН ТАНИЛЦУУЛГА: Нэхэмжлэгч нь Авлигатай тэмцэх газрын даргын албан тушаал шилжүүлэн томилсон тушаалыг хууль бус гэж үзэн хүчингүй болгуулж, өмнөх албан тушаалд эгүүлэн тогтоох нэхэмжлэл гаргасан. Нэхэмжлэгчийг тус газрын нэг хэлтэс доторх өөр хоорондоо ажлын байрны тодорхойлолт ялгаатай хоёр албан тушаалд зөвшөөрөлгүйгээр шилжүүлэн томилсон нь маргааны үндэс болсон. Хариуцагч нь тушаалыг албан ажлын зайлшгүй шаардлага, байгууллагын даргын бүрэн эрхийн хүрээнд гарсан дотоод шийдвэр тул ажилтны зөвшөөрөл шаардахгүй гэж тайлбарласан.

АНХАН ШАТ: Шүүх нэхэмжлэгчийг өмнөх албан тушаалд эгүүлэн тогтоож, маргаан бүхий тушаалыг хүчингүй болгосон. Харин ажилгүй байсан хугацааны цалин хөлсний нэхэмжлэлийг хэрэгсэхгүй болгожээ. Шүүх нэхэмжлэгчийг зөвшөөрөлгүйгээр, өөр ажлын байрны тодорхойлолттой албан тушаалд шилжүүлэн томилсон нь Төрийн албаны тухай хуулийн 24.1, 27.2.1-д заасныг зөрчсөн гэж үзсэн.

ДАВЖ ЗААЛДАХ ШАТ: Хариуцагч анхан шатны шүүх хуулийг буруу тайлбарлаж, хэрэгт хамааралгүй хуулийн заалт хэрэглэсэн, албан тушаал шилжүүлсэн нь байгууллага доторх шилжүүлэлт тул ажилтны зөвшөөрөл шаардахгүй гэсэн үндэслэлээр гомдол гаргасан. Давж заалдах шатны шүүх анхан шатны шүүхийн шийдвэрт хуулийн зүйл заалтыг өөрчлөн тодотгож, нэхэмжлэгчийг эгүүлэн тогтоосон хэсгийг баталж, хариуцагчийн гомдлыг хангахгүй орхив.

ҮНДЭСЛЭЛ: Давж заалдах шатны шүүх нэхэмжлэгчийг өөр ажлын байрны тодорхойлолттой албан тушаалд түүний зөвшөөрөлгүйгээр шилжүүлэн томилсон нь Төрийн албаны тухай хуулийн 22.1 болон Авлигын эсрэг хуулийн 30.1-д заасан хуулийн заалтыг зөрчсөн гэж дүгнэжээ. Хуульд заасан зөвшөөрөл шаардах заалт нь байгууллага доторх нэг нэгжээс нөгөө нэгжид албан тушаал шилжүүлэх тохиолдолд ч хамаарах бөгөөд хариуцагчийн албан ажлын зайлшгүй шаардлага гарсан гэх тайлбар нотлогдоогүй байна. Албан тушаал шилжүүлсэн нь төрийн албаны тогтвортой байх зарчмыг зөрчсөн тул Авлигатай тэмцэх газрын даргын тушаал хууль бус юм. Иймд анхан шатны шүүхийн шийдвэрийн үндэслэлийг хуулийн зүйл, хэсгийг тодотгон өөрчилж, нэхэмжлэлийг хангасан нь зөв гэж үзэв.