Тогтоол №712

ХЭРГИЙН ТАНИЛЦУУЛГА: Нэхэмжлэгч нь газар эзэмших эрхтэй, худалдаа үйлчилгээний зориулалттай барилгатай байсан. Нийслэлд хийгдсэн авто замын өргөтгөл, шинэчлэлийн ажлын улмаас нэхэмжлэгчийн өмчлөлийн газар болон барилга нь замын трасст албан ёсоор өртөөгүй хэдий ч бодит байдал дээр орц гарцгүй болж, зориулалтаар ашиглах боломжгүй болсон. Бусад иргэдэд нөхөн олговор олгосон боловч хариуцагч тал нэхэмжлэгчид нөхөн олговор олгохоос татгалзсан. Нэхэмжлэгч нь нөхөн олговор олгохгүй байгаа эс үйлдэхүйг хууль бус болохыг тогтоолгож, нөхөн олговор гаргуулахыг шаардсан.

АНХАН ШАТ: Шүүх нэхэмжлэгчийн шаардлагыг бүхэлд нь хангаж, нөхөн олговор олгохгүй байгаа Нийслэлийн Засаг дарга, Нийслэлийн Өмчийн харилцааны газрын эс үйлдэхүйг хууль бус болохыг тогтоосон. Тухайн асуудлыг хуульд нийцүүлэн шийдвэрлэж, нэхэмжлэгчид нөхөн олговор олгохыг хариуцагчдад даалгасан. Шийдвэрийг Засаг захиргаа, нутаг дэвсгэрийн нэгж, түүний удирдлагын тухай хуулийн 29.2, Газрын тухай хуулийн 4.1.3, 42.3, 43.4, Төсвийн тухай хуулийн 41.2.2-т заасныг үндэслэсэн.

ДАВЖ ЗААЛДАХ ШАТ: Хариуцагч Нийслэлийн Засаг даргын итгэмжлэгдсэн төлөөлөгч анхан шатны шүүх нэхэмжлэгчийн өмч авто замын трасст өртөөгүйг үнэлээгүй, бодит нөхцөл байдал болон эс үйлдэхүй тогтоогдоогүй байхад шийдвэрлэсэн нь буруу гэж гомдол гаргасан. Давж заалдах шатны шүүх анхан шатны шүүхийн шийдвэрийг хэвээр үлдээж, хариуцагчийн давж заалдах гомдлыг хангахгүй орхисон.

ҮНДЭСЛЭЛ: Анхан шатны шүүх хэрэг хянан шийдвэрлэх ажиллагааны журам зөрчөөгүй, нотлох баримтад үндэслэл бүхий дүгнэлт хийсэн нь зөв. Нэхэмжлэгчийн өмч авто замын албан ёсны трасст ороогүй хэдий ч, авто замын өргөтгөлийн ажлын улмаас бодит байдал дээр тухайн өмчийн орц гарц хаагдаж, худалдаа үйлчилгээний зориулалтаар ашиглах боломжгүй болсон нь шүүхийн үзлэг, фото зураг, гэрчүүдийн мэдүүлгээр тогтоогдсон. Нийслэлийн Өмчийн харилцааны газраас нөхөн олговор олгохоос татгалзсан нь хууль бус эс үйлдэхүй болох нь нотлогдсон. Иймд хариуцагчид нь Газрын тухай хуулийн 42.3, 43.4 дэх заалтуудын дагуу нөхөн олговор олгох үүрэгтэй. Мөн Газрын тухай хуулийн 35.1.1, 35.1.3-д заасан газар эзэмшигчийн эрх зөрчигдсөн тул хохирлыг нөхөн төлүүлэх эрхтэй.