Тогтоол №5317

ХЭРГИЙН ТАНИЛЦУУЛГА: Иргэн нь түргэн үйлчилгээний цэгээ эрх бүхий байгууллагын зөвшөөрөлгүй ашиглаж, нийтийн эзэмшлийн газарт байршуулсан зөрчлийн улмаас байцаагч үйлдэгчид торгууль ногдуулж, зөрчлийг арилгах албан даалгавар өгчээ. Үйлдэгч уг албан даалгаврыг биелүүлээгүй тул байцаагч шүүхэд хандаж, албадан гүйцэтгүүлэхээр хүсэлт гаргасан. Байцаагчийн гаргасан албан даалгавар нь илт хууль бус болохыг тогтоолгохоор иргэн анхан шатны шүүхэд нэхэмжилжээ. АНХАН ШАТ: Анхан шатны шүүх нэхэмжлэлийг хангаж, байцаагчийн гаргасан газар чөлөөлөх тухай албан даалгавар нь байгууллагын чиг үүрэгт үл хамаарах тул илт хууль бус болохыг тогтоосон. ДАВЖ ЗААЛДАХ ШАТ: Хариуцагч байцаагч нь анхан шатны шүүхийн шийдвэртэй санал нийлэлгүй, албан даалгавар нь зөрчлийг арилгах арга хэмжээний хүрээнд гаргасан, захиргааны актын шинжгүй, харьяаллын дагуу хийсэн үйл ажиллагаа байсан, нэхэмжлэгч нь эрх бүхий албан тушаалтны шийдвэрт хуулийн хугацаанд гомдол гаргаагүй байсан гэж үзэн давж заалдах гомдол гаргажээ. ҮНДЭСЛЭЛ: Давж заалдах шатны шүүх нь байцаагч нь хууль тогтоомжоор олгогдсон чиг үүргийн дагуу иргэний зөрчлийг шалгаж, зөрчлийг арилгуулахаар албан даалгавар өгсөн нь хууль бус биш, нэхэмжлэгч нь торгуулийг төлсөн хэдий ч зөрчлийг давтан үйлдэж байсан тул эрх бүхий албан тушаалтны гаргасан албан даалгавар нь нэхэмжлэгчийн эрх, хууль ёсны ашиг сонирхлыг хөндөөгүй гэж үзэн анхан шатны шүүхийн шийдвэрийг хүчингүй болгож, нэхэмжлэлийн шаардлагыг бүхэлд нь хэрэгсэхгүй болгож шийдвэрлэсэн.