Тогтоол №5266

ХЭРГИЙН ТАНИЛЦУУЛГА: "И" ХХК нь газар ашиглах эрхийн гэрчилгээний хугацааг сунгахгүй байгаа нийслэлийн Засаг даргын үйл ажиллагааг хууль бус болохыг тогтоолгож, хугацааг сунгахыг даалгахыг шаарджээ. АНХАН ШАТ: Захиргааны ерөнхий хуулийн 4 дүгээр зүйлийн 4.2.5-д заасныг баримтлан нэхэмжлэлийг бүхэлд нь хангаж, нийслэлийн Засаг даргын үйлдэл хууль бус болохыг тогтоож, "И" ХХК-ийн газар ашиглах эрхийн гэрчилгээний хугацааг сунгахыг даалгажээ. ДАВЖ ЗААЛДАХ ШАТ: Хариуцагчийн итгэмжлэгдсэн төлөөлөгч анхан шатны шүүхийн шийдвэрийг эсэргүүцэж, "И" ХХК нь газраа зориулалтын дагуу ашиглаагүй, холбогдох хууль, тогтоомжийн хэрэгжилтийг хангаагүй тул мэдэгдэл хүргүүлснийг, мөн шүүх гуравдагч этгээдийн үйлдэлтэй холбон тайлбарласан нь үндэслэлгүй, "И" ХХК-д газраа зориулалтын дагуу ашиглах боломжоор хангасан болохыг дурдаад, шийдвэрийг хүчингүй болгож, нэхэмжлэлийг хэрэгсэхгүй болгохыг хүссэн.

ҮНДЭСЛЭЛ: Анхан шатны шүүх нь хэргийн нөхцөл байдлыг бүрэн тогтоогоогүй, Захиргааны хэрэг шүүхэд хянан шийдвэрлэх тухай хуулийг зөрчсөн нь шийдвэрт нөлөөлсөн тул анхан шатны шүүхийн шийдвэрийг хүчингүй болгож, хэргийг дахин хэлэлцүүлэхээр буцаажээ. Тодруулбал, нэхэмжлэгчийн газар дээрх бусдын байгууламжууд (цахилгаан дэд станц, хогийн сав, асфальтан зам) нь газраа зориулалтын дагуу ашиглах боломжгүй болсон эсэхийг тогтоох, мөн тухайн байгууламжуудтай холбоотой эрх ашиг нь хөндөгдөж болзошгүй гуравдагч этгээдийг (Н ХХК) хэрэг хянан шийдвэрлэх ажиллагаанд оролцуулалгүй шийдвэр гаргасан нь Захиргааны хэрэг шүүхэд хянан шийдвэрлэх тухай хуультай нийцэхгүй гэж үзжээ.