Тогтоол №2838

ХЭРГИЙН ТАНИЛЦУУЛГА: Компани газар эзэмших эрхийн гэрчилгээгээ хүчингүй болгосон захиргааны актын улмаас эрх ашиг нь зөрчигдсөн гэж үзэн, уг актыг хүчингүй болгуулах шаардлага бүхий нэхэмжлэл гаргасан. АНХАН ШАТ: Захиргааны байгууллагаас дахин шинэ акт гаргах хүртэл 2 сарын хугацаатай түдгэлзүүлж, уг хугацаанд шинэ акт гаргаагүй бол маргаан бүхий акт хүчингүй болохыг мэдэгдэж шийдвэрлэсэн. ДАВЖ ЗААЛДАХ ШАТ: Нэхэмжлэгч компанийн өмгөөлөгч нь анхан шатны шүүхийн шийдвэр үндэслэлгүй, компанийн газар эзэмших эрх дуусгавар болохоос өмнө эрх сунгуулах хүсэлт гаргасан, гэтэл захиргааны байгууллага хугацаа хэтрүүлэн шийдвэрлэсэн, мөн газар эзэмшээгүй гэх үндэслэл нь үгүй, эерэг үйлчлэл бүхий шийдвэр гарсан тул итгэл хамгаалах зарчим үйлчлэх ёстой, цаашилбал орон сууцны зориулалттай холбоотой тайлбар нь худал гэж гомдол гаргасан. Хариуцагчийн итгэмжлэгдсэн төлөөлөгч нь анхан шатны шүүх нотлох баримтыг үнэлээгүй, газрыг зориулалтын дагуу 2 жил дараалан ашиглаагүй гэх ойлголтыг буруу тайлбарласан, компани газар эзэмших гэрээнд заасны дагуу орон сууц бариагүй, эзэмшээгүй нь тогтоогдсон, гаргасан шийдвэр нь хууль ёсны бөгөөд үндэслэл бүхий гэж гомдол гаргасан.

ҮНДЭСЛЭЛ: Газар эзэмших эрхийг хүчингүй болгохдоо хуульд заасан 2 жилийн хугацааг гэрээ байгуулсан хугацаанаас тооцох ёстой. Захиргааны байгууллагаас 2017 онд шинээр гэрээ байгуулсан байхад 8 сарын дараа зориулалтын дагуу ашиглаагүй гэж үзэж эрхийг нь хүчингүй болгосон нь захиргааны үйл ажиллагаа зорилгодоо нийцсэн, үндэслэл бүхий байх зарчимд нийцэхгүй. Хэргийн бодит нөхцөл байдлыг тогтооход хангалттай нотлох баримт цугларсан байхад анхан шатны шүүх нэмж тодруулах шаардлагатай гэж үзэн түдгэлзүүлсэн нь үндэслэлгүй. Иймд анхан шатны шүүхийн шийдвэрийг өөрчилж, компанийн нэхэмжлэлийн шаардлагыг бүхэлд нь хангаж, захиргааны актыг хүчингүй болгох нь зүйтэй.