Тогтоол №4554

ХЭРГИЙН ТАНИЛЦУУЛГА: Компани нь барилгын сууриас гарсан хөрсний усыг байгууллагын зөвшөөрөлгүй Туул гол руу цутгасан тул улсын байцаагч Зөрчлийн тухай хуулийн 7.15-р зүйлийн 1.4-д заасныг үндэслэн шийтгэл оногдуулсан. Компани нь ус ашиглагч биш, хохирлын хэмжээг тооцоход хүчингүй болсон аргачлал хэрэглэсэн, зөрчлийн хэрэг бүртгэлтийн ажиллагаанд журмыг зөрчсөн гэж гомдол гаргав. АНХАН ШАТ: Компанийн гомдлын шаардлагад шүүх хэргийн бодит байдлыг тодруулах шаардлагатай гэж үзэн, тодруулах зүйлийн цар хүрээ шүүхийн шинжлэн судлах боломжоос хэтэрсэн тул хариуцагч дахин шинэ акт гаргах хүртэл гурван сараар шийтгэлийн хуудсыг түдгэлзүүлсэн. Хариуцагч захиргааны байгууллагаас тогтоосон хугацаанд шинэ акт гаргаагүй бол шийтгэлийг хүчингүй болгож, гомдол гаргагчийн улсын тэмдэгтийн хураамжийг улсын төсөвт үлдээхээр шийдвэрлэсэн. ДАВЖ ЗААЛДАХ ШАТ: Гомдол гаргагч нь анхан шатны шүүх хэрэгт авагдсан нотлох баримтыг буруу үнэлж, хууль зүйн үндэслэл бүхий дүгнэлт хийгээгүй, ялангуяа хохирол, нөхөн төлбөр тооцсон хэсэгт дүгнэлт хийгээгүй, хүчингүй болсон аргачлал хэрэглэсэн нь хууль бус гэж гомдол гаргасан. ҮНДЭСЛЭЛ: Шүүх нь хариуцагч байцаагчийн зөрчлийн хэрэг бүртгэлтийн ажиллагаа нь холбогдогчийн оролцоог хангахгүй, тайлбар авах эрхийг олгохгүй, нотлох баримтыг хуульд заасан журмын дагуу цуглуулаагүй, мөн улсын байцаагч нь хөрсний усыг Туул гол руу цутгасан үйлдлийн улмаас учирсан хохирлын хэмжээг тооцоход хүчингүй болсон аргачлал хэрэглэснийг тогтоосон. Гэвч энэ нь компани зөрчил огт гаргаагүй гэсэн дүгнэлт хийх үндэслэл болохгүй бөгөөд шүүх хэргийн нөхцөл байдлыг тодруулах шаардлагатай гэж үзэн, хариуцагчаас дахин шинэ акт гаргах хүртэл 58 хоногоор актыг түдгэлзүүлсэн нь хуульд нийцсэн гэж үзжээ.