Тогтоол №4539

ХЭРГИЙН ТАНИЛЦУУЛГА: Сонгуулийн зардлын дансны мэдээллийг хуулийн хугацаанд холбогдох байгууллагад бүртгүүлээгүйн улмаас татварын улсын байцаагчаас оногдуулсан шийтгэлийг хүчингүй болгуулах тухай. АНХАН ШАТ: Зөрчлийн тухай хуулийн 17.1 дүгээр зүйлийн 21, Сонгуулийн тухай хуулийн 50.3, 57.2.8-д заасныг баримтлан, нэр дэвшигчийн гомдлыг хангаж, татварын улсын байцаагчийн шийтгэлийг хүчингүй болгосон. ДАВЖ ЗААЛДАХ ШАТ: Анхан шатны шүүхийн шийдвэр хууль ёсны болон үндэслэл бүхий байх шаардлагыг хангаагүй тул шийдвэрийг хүчингүй болгож, гомдлыг хэрэгсэхгүй болгосон. Нэр дэвшигч нь дансны мэдээллийг хуулийн хугацаанд бүртгүүлээгүй болох нь тогтоогдсон.

ҮНДЭСЛЭЛ: Сонгуулийн зардлын дансны мэдээллийг санал авахаас 20 хоногийн өмнө төрийн аудитын байгууллагад мэдэгдэж, бүртгүүлэх үүрэг нь нэр дэвшигчид хамаатай бөгөөд энэ үүргээ биелүүлээгүй нь Зөрчлийн тухай хуулийн 17.1 дүгээр зүйлийн 21-д заасан зөрчилд тооцогдоно. Анхан шатны шүүх энэ хуулийн зохицуулалтыг буруу тайлбарлаж, нэр дэвшигчийн зардлын тайлангийн аудит болон санхүүжилт хуульд нийцсэн байдлыг үндэслэл болгон шийтгэлийг хүчингүй болгосон нь буруу байна.