Тогтоол №4032

ХЭРГИЙН ТАНИЛЦУУЛГА: “Н” ХХК махны үнээ үндэслэлгүй нэмсэн гэх үндэслэлээр Шударга өрсөлдөөн, хэрэглэгчийн төлөө газрын даргын шийтгэлийг хүчингүй болгуулахаар анхан шатны шүүхэд гомдол гаргасан. АНХАН ШАТ: Захиргааны хэргийн анхан шатны шүүх “Н” ХХК-ийн гомдлыг хангаж, улсын байцаагчийн шийтгэлийг хүчингүй болгосон. Үүнд Өрсөлдөөний тухай хуулийн 12.1, Гамшгаас хамгаалах тухай хуулийн 34.2.9, Зөрчлийн тухай хуулийн 5.13-ыг тус тус баримтлав. ДАВЖ ЗААЛДАХ ШАТ: Хариуцагч тал анхан шатны шүүхийн шийдвэрийг эс зөвшөөрч, “Н” ХХК-ийн үйлдэл нь Өрсөлдөөний тухай хууль, Засгийн газрын тогтоолоор олгогдсон эрх хэмжээний хүрээнд хийгдсэн, мах бэлтгэн нийлүүлэгч үнээ нэмээгүй байсан гэх үндэслэлээр гомдол гаргасан.

ҮНДЭСЛЭЛ: Давж заалдах шатны шүүх анхан шатны шүүхийн шийдвэрийг хэвээр үлдээж, хариуцагчийн гомдлыг хангахгүй орхисон. Учир нь “Н” ХХК нь жижиглэнгээр худалдаж буй мах, махан бүтээгдэхүүний салбарт давамгай байдалтай, эсхүл монополь аж ахуй эрхлэгч биш тул Өрсөлдөөний тухай хуулиар зохицуулагдах харилцаанд үл хамаарна. Засгийн газрын тогтоол нь үнэ нэмсэн үйлдэл бүрийг Өрсөлдөөний тухай хуультай холбон хариуцлага ногдуулах эрх олгоогүй, харин үнэ нэмсэн үйлдэл нь цар тахлын дэгдэлттэй давхцсан тохиолдолд Гамшгийн тухай хуулийн 34.2.9-д заасан үүргээ биелүүлээгүй гэсэн үндэслэлээр хариуцлага хүлээлгэх боломжтой байсныг тэмдэглэжээ.