Тогтоол №3017

ХЭРГИЙН ТАНИЛЦУУЛГА: “МСЭХ” ХХК нь банк байгуулах тусгай зөвшөөрөл хүссэн өргөдлийг Монгол банк шийдвэрлээгүй нь хууль бус байсныг тогтоож, хуулийн дагуу шийдвэрлэхийг даалгахыг шаардсан. АНХАН ШАТ: Банкны тухай хууль, Захиргааны ерөнхий хуульд заасныг үндэслэн нэхэмжлэлийн шаардлагыг хангаж, Монгол банкны эс үйлдэхүйг хууль бус болохыг тогтоож, өргөдлийг хуулийн дагуу шийдвэрлэхийг даалгасан. ДАВЖ ЗААЛДАХ ШАТ: Хариуцагчийн төлөөлөгч шүүх хуралдаанд гаргасан тайлбарыг харгалзалгүй, нотлох баримт цуглуулаагүй, Тагнуулын ерөнхий газарт хандсан асуудлыг шүүх үл тоомсорлосон, банк байгуулах тусгай зөвшөөрөл хүссэн өргөдлийг шийдвэрлэх хуулийн хугацаа хэтрээгүй байхад нэхэмжлэл гаргасан, “түдгэлзүүлсэн” нь эцсийн шийдвэр биш, үндэсний эдийн засгийн аюулгүй байдлыг тогтоох шаардлагатай тул шийдвэрлэх ажиллагааг үргэлжлүүлсэн нь хууль бус эс үйлдэхүй биш гэж үзэн анхан шатны шийдвэрийг хүчингүй болгож, хэргийг дахин хэлэлцүүлэхээр буцаахыг хүссэн. ҮНДЭСЛЭЛ: Монгол банкнаас өргөдлийг хүлээн авсан өдрөөс хойш 60 хоногийн дотор шийдвэрлэх үүрэгтэй байсан боловч нэмэлт материал шаардлагагүй гэж үзсэний дараа “түдгэлзүүлсэн” нь хуульд заасан журмыг зөрчсөн үйлдэл болсон. Монгол банкны “өргөдлийг шийдвэрлэх ажиллагааг түдгэлзүүлэх” шийдвэр нь хууль бус байсан тул анхан шатны шүүхийн шийдвэр хууль ёсны бөгөөд үндэслэл бүхий байна. Хариуцагчийн давж заалдах гомдол нь үндэслэлгүй.