Тогтоол №2201

ХЭРГИЙН ТАНИЛЦУУЛГА: "УН" ХХК нь Сонгинохайрхан дүүргийн Засаг дарга, Газрын албанд холбогдуулан Сонгинохайрхан дүүргийн Засаг даргын захирамжийн нэг хэсгийг хүчингүй болгуулах, мөн газрын албаны буруутай үйлдлийг тогтоолгож, газар эзэмших хүсэлтийг хуульд нийцүүлж шийдвэрлүүлэхийг шаардсан. АНХАН ШАТ: Газрын тухай хуулийн 31.2, 32.3-т заасныг үндэслэн нэхэмжлэлийн бүх шаардлагыг хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүхээс гаргасан шийдвэрийг эс зөвшөөрч, хавтаст хэрэгт цугларсан баримтыг хуульд нийцүүлэн үнэлээгүй, тодорхой хуулийн зүйл заалтыг буруу хэрэглэсэн, гэрчийн мэдүүлгийг гуйвуулсан, хэргийн ач холбогдолтой баримтуудыг үнэлэхдээ алдаа гаргасан хэмээн гомдол гаргасан.

ҮНДЭСЛЭЛ: Давж заалдах шатны шүүхээс анхан шатны шүүхийн шийдвэрийг өөрчлөн, Сонгинохайрхан дүүргийн Засаг даргын захирамжийн гуравдагч этгээд Ц.А-д холбогдох хэсгийг хүчингүй болгох нь зүйтэй гэж дүгнэсэн. Учир нь Газрын тухай хуулийн 33.1.2-т заасны дагуу төсөл сонгон шалгаруулалтын журмаар эзэмшүүлэх газар байхад, Ц.А-д хууль бусаар газар эзэмших эрх олгосон нь шударга ёс, тэгш байдлын зарчимд нийцээгүй байна. Харин Газрын албаны "УН" ХХК-ийн газар эзэмших хүсэлтийг хуульд нийцүүлж шийдвэрлээгүй буруутай үйлдлийг тогтоолгох, 1680 м.кв газар эзэмших хүсэлтийг хуульд нийцүүлэн шийдвэрлүүлэхийг даалгах нэхэмжлэлийн шаардлагыг хэрэгсэхгүй болгосон нь үндэслэлтэй байна.