Тогтоол №1601

ХЭРГИЙН ТАНИЛЦУУЛГА: "М м " ХХК нь Ашигт малтмал, газрын тосны газрын Кадастрын хэлтэст холбогдох хэргийн шаардлагаа хангуулахаар нэхэмжлэл гаргасан. АНХАН ШАТ: Анхан шатны шүүх "М м " ХХК-ийн нэхэмжлэлийн шаардлагыг Ашигт малтмалын тухай хуулийн 11 дүгээр зүйлийн 11.1.16, 11.2-т заасныг үндэслэн бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүхийн шийдвэрийг эс зөвшөөрч, хайгуулын тусгай зөвшөөрөл хүссэн өргөдлийг нь хүлээн авах журмыг хоёр өөр хуулиар зохицуулсан нь үндэслэлгүй, мөн өргөдөл хүлээн авах ажиллагааг түр зогсоосон нь хууль зөрчсөн гэж гомдол гаргасан. Гэвч давж заалдах шатны шүүх анхан шатны шүүхийн шийдвэрийг хэвээр үлдээж, нэхэмжлэгчийн гомдлыг хангахгүй орхисон.

ҮНДЭСЛЭЛ: Ашигт малтмалын тухай хуулиар тусгай зөвшөөрөл хүссэн өргөдлийг хэрхэн шийдвэрлэх журмыг нарийвчлан зохицуулсан боловч, өргөдөл хүлээн авах хэлбэр, газар, цагийн хуваарийн талаар зохицуулаагүй тул энэ асуудлыг Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хуулийн дагуу зохицуулсан нь хууль зүйн үндэслэлтэй. Хайгуулын тусгай зөвшөөрөл хүссэн өргөдлийн дугаарыг цахим хэлбэрээр олгох үйл ажиллагааг сайжруулах зорилгоор тодорхой хугацаанд өргөдөл хүлээн авах ажиллагааг түр зогсоож, нийтэд мэдээлсэн нь бусад нэхэмжлэгчидтэй тэгш байдал, шударга ёсны зарчимд нийцсэн.