Тогтоол №1363

ХЭРГИЙН ТАНИЛЦУУЛГА: Дүүргийн Засаг даргын захирамжаар албан тушаалаас чөлөөлөгдсөн төрийн албан хаагч нь улс төрийн шалтгаанаар, зохион байгуулалтын өөрчлөлт нэрийн дор халсан, өөрөө хүсэлт гаргаагүй хэмээн захирамжийг хүчингүй болгож, албан тушаалд эгүүлэн тогтоолгох, ажилгүй байсан хугацааны цалин хөлстэй тэнцэх олговор гаргуулах, нийгмийн даатгалын шимтгэл нөхөн төлүүлэхийг нэхэмжилжээ.

АНХАН ШАТ: Нэхэмжлэлийн шаардлагыг бүхэлд нь хангаж, Засаг даргын захирамжийг хүчингүй болгож, нэхэмжлэгчийг урьд эрхэлж байсан албан тушаалд эгүүлэн тогтоож, ажилгүй байсан хугацааны цалин хөлстэй тэнцэх олговор олгох, нийгмийн болон эрүүл мэндийн даатгалын шимтгэлүүдийг нөхөн тооцож, дэвтэрт бичилт хийхийг даалгасан. Шийдвэрт Төрийн албаны тухай хуулийн 14.1.5, Захиргааны ерөнхий хуулийн 40.3, 40.4, Төрийн албаны тухай хуулийн 11.6, Хөдөлмөрийн тухай хуулийн 69.1-ийг баримталжээ.

ДАВЖ ЗААЛДАХ ШАТ: Хариуцагч нь нэхэмжлэгчийг өөрөө ажлаас чөлөөлөгдөх хүсэлт гаргаж, тэтгэмж авсан боловч хүсэлтээ нууцаар авч, шүүхэд хандсан тул анхан шатны шүүх хэргийг үнэн зөв шийдвэрлээгүй гэх үндэслэлээр давж заалджээ. Давж заалдах шатны шүүх анхан шатны шүүхийн шийдвэрийг хэвээр үлдээж, хариуцагчийн гомдлыг хангахаас татгалзсан.

ҮНДЭСЛЭЛ: Анхан шатны шүүх хэрэгт цугларсан нотлох баримтуудад үндэслэн хуулийг зөв тайлбарлаж хэрэглэсэн. Маргаан бүхий захиргааны актад баримталсан Төрийн албаны тухай хуулийн 27.2.4 дэх заалт (байгууллага татан буугдах, орон тоо хасагдах) нь энэ хэрэгт хамаарахгүй болох нь тогтоогдсон. Нэхэмжлэгчийг өөрийн хүсэлтээр ажлаас чөлөөлөгдсөн гэх үйл баримтыг гэрчүүдийн мэдүүлэг хангалттай нотолж чадаагүй. Төрийн жинхэнэ албан хаагч өөрийн хүсэлтээр чөлөөлөгдөхөд Төрийн албаны тухай хуулийн 24.1.3-ыг баримтлах ёстой байхад Хөдөлмөрийн тухай хуулийн 38.1.1, 40.1.1-ийг баримталсан нь хууль хэрэглээний алдаатай. Захиргааны актыг гаргах шалтгаан болсон бодит нөхцөл байдал, хууль зүйн үндэслэлээ тодорхой заагаагүй, үндэслэсэн заалтууд нь хоорондоо зөрчилтэй байсан тул Захиргааны ерөнхий хуулийн 40.3, 40.4-т заасан шаардлагыг хангаагүй байна. Гэхдээ хариуцагч нь шүүхээс тогтоосон олговор олгохдоо өмнө олгосон тэтгэмжээ суутгах эрхтэй.