Тогтоол №1293

ХЭРГИЙН ТАНИЛЦУУЛГА: Нэхэмжлэгч нь хүүхэд асрах чөлөөтэй байх хугацаанд байгууллагын бүтцийн өөрчлөлтөөр орон тоо цөөрсөн тул хариуцагч түүнд тэтгэмж олгож, хөдөлмөрийн харилцааг дуусгавар болгосон захиргааны актыг хууль бус болохыг тогтоолгож, өмнөх ажилд эгүүлэн тогтоолгох эсвэл адил чанарын ажил албан тушаалд томилуулахаар нэхэмжилжээ.

АНХАН ШАТ: Хариуцагчийн тэтгэмж олгох тушаалыг илт хууль бус болохыг тогтоож, хүчингүй болгон, нэхэмжлэгчийг адил чанарын ажил албан тушаалд томилохыг даалгасан. Нэхэмжлэгчийг өмнөх ажлын байранд нь эгүүлэн тогтоох шаардлагыг хэрэгсэхгүй болгосон. Төрийн албаны тухай хуулийн 11.6, Хөдөлмөрийн тухай хуулийн 100.1, 36.2-т заасныг үндэслэсэн.

ДАВЖ ЗААЛДАХ ШАТ: Хариуцагч гомдолдоо тэтгэмж олгох тушаал нь Захиргааны ерөнхий хуулийн 47 дугаар зүйлд заасан үндэслэлгүйгээр "илт хууль бус" гэж тооцогдохгүй, мөн адил чанарын ажил албан тушаалд томилуулах нь байгууллагын бүтцэд тийм орон тоо байхгүй, бусад албан хаагчийн эрхийг зөрчих, Төрийн албаны хуулийг зөрчсөн үйлдэл хийхийг албадаж байна хэмээн шийдвэрийг хүчингүй болгохыг хүссэн.

ҮНДЭСЛЭЛ: Нэхэмжлэгчийн ажиллаж байсан хэлтэс татан буугдсан ч чиг үүрэг нь шилжсэн тул байгууллага татан буугдсан гэж үзэхгүй. Нэхэмжлэгчийн ажлын байрны орон тоо цөөрсөн тул Төрийн албаны тухай хуулийн 27.2.4-т заасан нэмэгдэл баталгааг эдлэх эрхтэй. Хариуцагч нь хүүхэд асрах чөлөөтэй байсан нэхэмжлэгчийн хөдөлмөрийн харилцааг тэтгэмж олгож дуусгавар болгосон нь Хөдөлмөрийн тухай хуулийн 100.1-д заасан жирэмсэн эмэгтэй, гурав хүртэлх насны хүүхэдтэй эхийг ажлаас халахыг хориглосон заалтыг зөрчсөн. Иймд тэтгэмж олгосон тушаал нь Захиргааны ерөнхий хуулийн 47.1.6-д зааснаар "иргэний эрх, хууль ёсны ашиг сонирхолд халдах хуульд заасан үндэслэл байгаагүй" тул илт хууль бус захиргааны акт мөн. Хариуцагч нь нэхэмжлэгчийн цалин хөлсийг бууруулахгүйгээр мэргэжил, мэргэшлийн дагуу өөр ажил, албан тушаалд шилжүүлэх боломжийг сонгож, Төрийн албаны тухай хуулийн 27.2.4-т заасан нэмэгдэл баталгааг хангах үүрэгтэй. Энэ нь бусад албан хаагчийн эрхийг зөрчихгүй бөгөөд шийдвэрийг биелүүлэх боломжтой. Иймд анхан шатны шүүхийн шийдвэрт нэхэмжлэгчийг цалин хөлсийг бууруулахгүйгээр мэргэжил, мэргэшлийн дагуу өөр ажил, албан тушаалд шилжүүлэх нэмэгдэл баталгааг хангахыг даалгаж, Төрийн албаны тухай хуулийн 4.2.6, 11.6, 27.2.3, 27.2.4, Хөдөлмөрийн тухай хуулийн 100.1-д заасныг баримтлан зөвтгөсөн өөрчлөлт оруулж, давж заалдах гомдлыг хангахгүй орхисон.