Тогтоол №1119

ХЭРГИЙН ТАНИЛЦУУЛГА: "Кроун" ХХК нь Ашигт малтмал, газрын тосны газрын Кадастрын хэлтсийн тусгай зөвшөөрлүүдийг цуцалсан шийдвэрийг хүчингүйд тооцуулж, эзэмших эрхийг сэргээхгүй байгаа эс үйлдэл нь хууль бус болохыг тогтоолгох, эрхийг сэргээхийг даалгах нэхэмжлэл гаргажээ. Өмнөх шүүхийн шийдвэрээр тусгай зөвшөөрлийн хугацааг сунгахыг даалгасан боловч хариуцагч хугацааг буруу тооцож, төлбөр төлсөн хугацаатай зөрчилдүүлсэн нь нэхэмжлэгчийн эрхийг зөрчсөн гэж маргасан.

АНХАН ШАТ: Нийслэл дэх Захиргааны хэргийн анхан шатны шүүх "Кроун" ХХК-ийн нэхэмжлэлийг бүхэлд нь хэрэгсэхгүй болгож шийдвэрлэжээ.

ДАВЖ ЗААЛДАХ ШАТ: Нэхэмжлэгч хуулийг буруу хэрэглэсэн, тусгай зөвшөөрлийн хугацааг буруу тооцсоноос эрх нь зөрчигдсөн гэх үндэслэлээр давж заалджээ. Давж заалдах шатны шүүх анхан шатны шүүхийн шийдвэрийг хүчингүй болгож, нэхэмжлэлийг бүхэлд нь хангав.

ҮНДЭСЛЭЛ: Анхан шатны шүүх хэрэгт авагдсан баримтыг буруу үнэлж, нэхэмжлэлийг үндэслэлгүй хэрэгсэхгүй болгосон. Хариуцагч нь өмнөх шүүхийн шийдвэрийн дагуу тусгай зөвшөөрлийн хугацааг сунгахдаа хугацаа сунгасан шийдвэр гаргасан өдөр болон төлбөр төлөгдсөн хугацааг ялгаатай тэмдэглэж, тусгай зөвшөөрлийн хүчин төгөлдөр байх хугацааг буруу тодорхойлсон нь төрийн үйл ажиллагааны шударга ёсны зарчим, Ашигт малтмалын тухай хуулийн 4.1.20, 11.1.7, 11.2, 21.1.5-д заасныг зөрчсөн. Иймд тусгай зөвшөөрлийн хугацааг 2015 оны 7 дугаар сарын 23-ны өдрөөр дуусгавар болгосон бүртгэлийг хүчингүй болгож, нэхэмжлэгчийн эрхийг үлдэгдэл хугацаагаар сэргээж шийдвэрлэв.