Тогтоол №9538

ХЭРГИЙН ТАНИЛЦУУЛГА: Компани нь Богд-Хан уулын дархан цаазат газарт аялал жуулчлалын зориулалтаар газар эзэмших эрх авч, үүргээ биелүүлж байсан. Гэвч Байгаль орчин, аялал жуучлалын сайд компанийн газрыг ашиглах эрхийг нь дуусгавар болгосон нь хууль бус гэж үзэн, уг тушаалын зарим хэсгийг илт хууль бус болохыг тогтоолгохоор шүүхэд хандсан. Компанийн үзэж буйгаар тухайн газар нь усны хамгаалалтын бүсэд хамаарахгүй бөгөөд байгалийн төлөв байдлыг алдагдуулах үйл ажиллагаа явуулаагүй, газрын гэрээнд заасан эрх дуусгавар болох үндэслэл үүсээгүй байна.

Сайдын зүгээс тухайн газар нь Туул голын эрэг дээр, бургас модтой, усны нөөцийг бохирдуулж, байгалийн унаган төрхийг алдагдуулах эрсдэлтэй тул холбогдох хууль, журмыг үндэслэн газрыг ашиглах эрхийг нь дуусгавар болгосон гэж тайлбарласан.

АНХАН ШАТ: Шүүхээс компанийн нэхэмжлэлийг бүхэлд нь хэрэгсэхгүй болгож шийдвэрлэв. Учир нь, компанид газар ашиглах эрх олгосон анхны тушаал нь усны хамгаалалтын бүсэд хамаарах, бургас модыг устгах, байгалийн унаган төрхийг алдагдуулах эрсдэлтэй газарт хууль зөрчин олгогдсон байсан. Үүний улмаас сайд дараа нь холбогдох хууль, журмыг үндэслэн уг эрхийг нь цуцалсан нь хуульд нийцсэн байна.

ҮНДЭСЛЭЛ: Шүүх тогтоосноор, анх газар эзэмшүүлэх эрх олгохдоо хууль зөрчсөн байсан бөгөөд энэ нь усны нөөц хомсдох, бохирдох, бургас модыг устгах, огтлох эрсдэлтэй, хуулиар хориглосон газар байжээ. Улмаар энэ алдааг залруулах зорилгоор сайдын гаргасан дараах тушаал нь хуульд нийцсэн тул компанийн нэхэмжлэлийг хангах боломжгүй гэж дүгнэсэн. Компанийн тал бусад аж ахуйн нэгжтэй тэгш бус харьцаж байна гэсэн үндэслэл нь хууль зөрчин олгогдсон газрыг зөвтгөх үндэслэл болохгүй.