Тогтоол №8954

ХЭРГИЙН ТАНИЛЦУУЛГА: Сонгуулийн зардлын дансны мэдээлэл, банкны нэрийг хуульд заасан хугацаанд орон нутгийн төрийн аудитын газарт бүртгүүлээгүй нь Зөрчлийн тухай хуулийг зөрчсөн гэх үндэслэлээр ногдуулсан торгуулийг хүчингүй болгуулах гомдол. АНХАН ШАТ: Гомдол гаргагчийн нэр дэвшигчийн хувьд сонгуулийн зардлын дансны мэдээлэл, банкны нэрийг Төрийн аудитын газарт хуульд заасан хугацаанд мэдэгдэж, бүртгүүлээгүй нь тогтоогдож, Зөрчлийн тухай хуулийн 17.1 дүгээр зүйлийн 21-д зааснаар 10,000,000 төгрөгөөр торгох шийтгэл ногдуулсан нь үндэслэлтэй байна гэж үзэн гомдлыг хэрэгсэхгүй болгосон.

ҮНДЭСЛЭЛ: Аймаг, нийслэл, сум, дүүргийн иргэдийн Төлөөлөгчдийн Хурлын Сонгуулийн тухай хуулийн 50.3-т заасны дагуу нэр дэвшигч нь сонгуулийн зардлын дансны дугаар, банкны нэрийг санал авах өдрөөс 20 хоногийн өмнө төрийн аудитын орон нутгийн салбар байгууллагад мэдэгдэж, бүртгүүлэх үүрэгтэй. Нэр дэвшигч нь энэхүү үүргээ биелүүлээгүй нь Зөрчлийн тухай хуулийн 17.1 дүгээр зүйлийн 21-д заасан зөрчлийн шинжийг хангаж байна. Хууль тогтоомжийн талаар мэдээгүй, зөвлөмж авч чадаагүй, улсад хохирол учруулаагүй, торгууль төлөх боломжгүй, сонсох ажиллагаа явуулаагүй зэрэг нь хуульд заасан үүрэг, хариуцлагаас чөлөөлөгдөх үндэслэл болохгүй. Төрийн аудитын газрын дүгнэлт нь үйл баримтын мэдээллийг агуулсан, зөрчлийн хэргийн нотлох баримтаар үнэлэгдсэн.