Тогтоол №8316

ХЭРГИЙН ТАНИЛЦУУЛГА: Иргэн Ж.Х нь өөрт олгогдсон газар эзэмших эрхийн гэрчилгээг хүчингүй болгосон захиргааны актын үндэслэлгүй, хууль бус болохыг тогтоолгон, хүчингүй болгуулахыг шаардсан.

АНХАН ШАТ: Захиргааны актыг хүчингүй болгохдоо эрх нь хөндөгдөж буй иргэнд урьдчилан мэдэгдэж, тайлбар авах боломж олгоогүй, хуульд заасан үндэслэл, хугацааг зөрчсөн, мөн газрыг зориулалтын бусаар ашигласан, хууль бус үйл ажиллагаа явуулсан гэх үндэслэлүүд тогтоогдоогүй байхад гаргасан нь Захиргааны ерөнхий хуулийн зарчмууд болон холбогдох хуулийн зүйл заалтыг зөрчсөн тул нэхэмжлэлийг хангаж, захиргааны актыг хүчингүй болгосон.

ҮНДЭСЛЭЛ: Захиргааны акт нь иргэний газар эзэмших эрхийг хүчингүй болгосон бөгөөд үүнийг хийхдээ Захиргааны ерөнхий хуулийн 4 дүгээр зүйлийн 4.2.6, 26 дугаар зүйлийн 26.1-д заасан иргэний оролцоог хангах, урьдчилан мэдэгдэх зарчмыг зөрчсөн. Газрын тухай хуулийн 40 дүгээр зүйлийн 40.1.1, 40.1.6, Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 29 дүгээр зүйлийн 29.3, Газрын хэвлийн тухай хуулийн 7 дугаар зүйлийн 2 дахь хэсгийн 5 дахь заалт, Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай хуулийг буруу хэрэглэсэн. Иргэн Ж.Х-д газар эзэмших эрх олгосон захиргааны актыг 17 жилийн дараа хүчингүй болгосон нь Захиргааны ерөнхий хуулийн 48 дугаар зүйлийн 48.3-т заасан эерэг нөлөөлөл бүхий захиргааны актыг хүчингүй болгох 5 жилийн хугацааг зөрчсөн. Хууль хяналтын байгууллагаас иргэн Ж.Х-ийн хууль бус үйл ажиллагааг тогтоох талаар удаа дараах шийдвэрүүд гарсан нь тогтоогдоогүй байхад гаргасан захиргааны акт нь үндэслэлгүй.