Тогтоол №7905

ХЭРГИЙН ТАНИЛЦУУЛГА: Татварын улсын ахлах байцаагчаас албан тушаал бууруулж, шилжүүлэн томилсонтой холбогдуулан гаргасан нэхэмжлэлийн шаардлага. Нэхэмжлэгч нь албан тушаал бууруулсан, сонгон шалгаруулалт хууль бус болсон, албан тушаалд нь үргэлжлүүлэн ажиллуулаагүй эс үйлдлийг хууль бус гэж тогтоолгож, цалин хөлс нөхөн төлүүлэхийг шаардсан. Хариуцагч нь татварын байгууллагын зохион байгуулалтын шинэчлэл, орон тоо цөөрсөнтэй холбогдуулан хийсэн албан тушаалын өөрчлөлтийг хуульд нийцүүлсэн, сонгон шалгаруулалт хуулийн дагуу хийгдсэн, нэхэмжлэгч түр чөлөө авах хүсэлт гаргасны дагуу чөлөөлсөн гэж тайлбарласан.

АНХАН ШАТ: Нэхэмжлэлийн шаардлагыг бүхэлд нь хэрэгсэхгүй болгосон. Тухайлбал, албан тушаал бууруулсан нь эрх, хууль ёсны ашиг сонирхлыг зөрчсөн эсэх асуудлыг шүүх шийдвэрлээгүй байхад цөөрсөн албан тушаалд сонгон шалгаруулалт явуулж, нэхэмжлэгчийг шилжүүлэн томилсон нь хуульд нийцээгүй боловч, нэхэмжлэгчийг төрийн албанаас чөлөөлсөн тушаал гарсантай холбогдуулан нэхэмжлэгч болон татварын албаны хооронд үүссэн харилцаа дуусгавар болсон тул нэхэмжлэлийн шаардлагыг хангахад нэхэмжлэгчийн эрх, хууль ёсны ашиг сонирхол сэргэхгүй гэж үзжээ.

ҮНДЭСЛЭЛ: Төрийн албаны тухай хуулийн 39 дүгээр зүйлийн 39.1.15-д заасныг зөрчин, албан тушаал бууруулсан тушаалыг эс зөвшөөрч шүүхэд нэхэмжлэл гаргасан байхад цөөрсөн албан тушаалд сонгон шалгаруулалт хийж, нэхэмжлэгчийг шилжүүлэн томилсон нь хуульд нийцээгүй байна. Гэвч нэхэмжлэгчийн түр чөлөө авах хүсэлтийг үндэслэн төрийн албанаас чөлөөлсөн нь Төрийн албаны тухай хуулийн 46 дугаар зүйлийн 46.1.2-т заасныг зөрчсөн гэж үзэхгүй, нэхэмжлэлийн эрх, хууль ёсны ашиг сонирхлыг зөрчсөн гэж үзэхгүй байна.