Тогтоол №6616

ХЭРГИЙН ТАНИЛЦУУЛГА: Ачаа тээврийн компани нь экспортын нүүрс тээвэрлэлтээс үүссэн нэмэгдсэн өртгийн албан татварын (НӨАТ) буцаан олголтын дүнгээ бууруулж баталгаажуулсан татварын актыг эс зөвшөөрч, хүчингүй болгуулах шаардлага гаргасан. Компанийн зүгээс Засгийн газрын тогтоолоор хийгдсэн тээвэрлэлт нь гаалийн хяналтын бүсэд буулгаж дахин ачигдсан боловч энэ нь экспорттой холбоотой, мөн гадаадын компанид үзүүлсэн үйлчилгээ байсан тул НӨАТ-ын 0 хувийн хэмжээнд хамаарна гэж үзсэн. Хариуцагч татварын улсын байцаагч нар нь энэхүү тээвэрлэлтийг Монгол Улсын хилийн дотор хийсэн дотоодын тээвэрлэлт хэмээн үзэж, 10 хувийн НӨАТ ногдуулсан.

АНХАН ШАТ: Нэхэмжлэгч "И" ХХК-ийн татварын улсын байцаагч нарт холбогдуулан гаргасан нэхэмжлэлийг хангаж, нэмэгдсэн өртгийн албан татвалын ногдуулалт, төлөлтийг баталгаажуулсан актын холбогдох хэсгийг хүчингүй болгосон.

ҮНДЭСЛЭЛ: Шүүх хэргийн баримт, талуудын тайлбарт үндэслэн нэхэмжлэлийг хангасан. Нэхэмжлэгчийн гүйцэтгэсэн экспортын нүүрсний тээвэрлэлт нь Засгийн газрын тогтоолоор хийгдсэн бөгөөд ачааг гаалийн хяналтын бүсэд буулгаж дахин ачих нь тээвэрлэгчээс хамаарахгүй зохион байгуулалтын арга хэмжээ байсан. Нэмэгдсэн өртгийн албан татварын тухай хуулийн 12 дугаар зүйлийн 12.1.2-т заасан олон улсын ачаа тээврийн үйлчилгээнд хамаарах бөгөөд гаалийн хяналтын бүсэд буулгах нь Монгол Улсын хилийн дотор хийсэн тээвэрлэлт биш бөгөөд экспортын үйл явцтай холбоотой. Нэхэмжлэгчийн гүйцэтгэсэн үйлчилгээ нь гадаадын компанид үзүүлсэн үйлчилгээ байсан тул "0" хувьтай борлуулалтад хамаарах үндэслэлтэй гэж дүгнэлээ.